No menu items!
27.5 C
Sri Lanka
29 March,2024

අත්‍යවශ්‍ය සේවා කොමසාරිස් ජනරාල් ලෙස හමුදා නිලධාරියකු පත්කළේ වෙනත් අරමුණකටද?
හිටපු අමාත්‍යාංශ ලේකම් අශෝක පීරිස්

Must read

අත්‍යවශ්‍ය සේවා කොමසාරිස් ජනරාල්වරයා ලෙස සිවිල් නිලධාරියකු පත්නොකර හමුදා නිලධාරියකු පත්කිරීම වෙනත් අරමුණක් සඳහා කළ එකක්ද යන සැකයක් මතුවන බව හිටපු අමාත්‍යාංශ ලේකම්වරයකු වන ටී අශෝක පීරිස් මහතා ප්‍රකාශ කරයි.


ජනතාවට අත්‍යවශ්‍ය සේවා සැපයීමේ සැබෑ ප්‍රශ්නයක් ඇත්නම් ඒ සඳහා පත්කළ යුත්තේ සිවිල් නිලධාරියකු බවත් සිවිල් නිලධාරියාට ඒ සඳහා රටපුරා විසිරී සිටින රාජ්‍ය නිලධාරීන්ගේ සහයෝගය ලබාගත හැකිවීමේ බැඳීමක් තිබීම ඊට හේතුව බවත් ඔහු පෙන්වා දෙයි.


ඔහු මේ බව පැවසුවේ අත්‍යවශ්‍ය සේවා කොමසාරිස් ජනරාල්වරයා වශයෙන් හමුදා නිලධාරියකු පත්කිරීම ගැන ‘අනිද්දා’ කළ විමසීමකදීය.


1983 කළු ජුලිය පැවති අවස්ථාවේදී එවක ජනාධිපති ජේආර් ජයවර්ධන අත්‍යවශ්‍ය සේවා කොමසාරිස් ජනරාල් වශයෙන් පත්කළේ එවක අග්‍රාමාත්‍ය ලේකම් වශයෙන් කටයුතු කළ බ්‍රැඩ්මන් වීරකෝන්ව බවත් එම අවස්ථාවේදී රාජ්‍ය නිලධාරීන්ගෙන් එම කටයුත්ත සඳහා සහයෝගය ලබාගත් ආකාරය වීරකෝන් මහතා ඔහුගේ පොතේ විස්තර කර ඇති බවත් පීරිස් මහතා පැවසීය.


ජනාධිපතිවරයා හැර මේ වනවිට අත්‍යවශ්‍ය සේවා කොමසාරිස් ජනරාල්වරයා සමඟ හමුදා නිලධාරීන් 35 දෙනෙකු රජයේ තනතුරුවලට පත්කර ඇති බවත්, මේ ආකාරයට පත්කර ඇති හමුදා නිලධාරීන් අසමත් බව පෙන්නුම් කර ඇති බවත්, අත්‍යවශ්‍ය ආහාර ද්‍රව්‍ය සම්බන්ධයෙන්ම කටයුතු කරන පාරිභෝගික කටයුතු අධිකාරියේ ප්‍රධානියාද හමුදා නිලධාරියකු බවත් ඔහුගේ අසාර්ථකත්වය මත තවත් හමුදා නිලධාරියකු ඒ සඳහා පත්කරන්නට සිදුවී ඇති බවත් පීරිස් මහතා පෙන්වා දෙයි.


අත්‍යවශ්‍ය සේවා කොමසාරිස් ජනරාල්වරයා ලෙස ජනාධිපතිවරයා පත්කර ඇති විශ්‍රාමික මේජර් ජෙනරාල් එම්ඩීඑස්පී නිවුන්හැල්ල යුද හමුදා ජනාධිපති ආරක්ෂක බලසේනාවේ අධිපති ලෙස කටයුතු කළ අතර ඊට පෙර මහින්ද රාජපක්ෂ පාලන සමයේදී ජනාධිපතිවරයා ආරක්ෂක අමාත්‍යාංශ ලේකම්වරයා ලෙස කටයුතු කළ සමයේ ඔහුගේ ප්‍රධාන ආරක්ෂක නිලධාරියා ලෙස කටයුතු කළේය. ජනාධිපති ආරක්ෂක බලසේනාව පසුගිය යහපාලන ආණ්ඩු කාලයේදී විසුරුවා තිබූ අතර එය නැවත ස්ථාපිත කරනු ලැබුයේ වත්මන් ජනාධිපතිවරයා විසිනි.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි