21.6 C
Sri Lanka
26 September,2021

අත්‍යවශ්‍ය සේවා කළාට අරගල නතර වෙන්නේ නෑ – වැඩ කරන ජන බලය

Must read

■ අනුරංග ජයසිංහ

සෞඛ්‍ය සේවකයන්ට කොවිඩ්-19 වසංගතයෙන් ආරක්ෂා වීමට අවශ්‍ය පහසුකම් ලබා නොදී ඔවුන්ගේ වෘත්තීය අයිතිවාසිකම් මර්දනය කිරීමට සේවාවන් අත්‍යවශ්‍ය සේවා ලෙස නම් කිරීමට දැඩි විරෝධය පළ කරන බවත් එලෙස අත්‍යවශ්‍ය සේවාවලට ඇතුළත් කිරීමෙන් වෘත්තීය ක්‍රියාමාර්ග නතර කිරීමේ හැකියාවක් නොමැති බවත් වැඩකරන ජනබලය සංවිධානයේ සම-කැඳවුම්කරු ජෝසෆ් ස්ටාලින් පැවසීය.

ඒ එම සංවිධානයේ නිවේදනයක් පිළිබඳ අප කළ විමසීමකදී අදහස් දක්වමින්ය.

වැඩකරන ජනබලය සංවිධානය බැංකු, තැපැල්, ටෙලිකොම්, සෞඛ්‍ය, ඇඟලුම් කර්මාන්ත සහ අනෙකුත් සේවාවන් ගණනාවක් නියෝජනය කරන වෘත්තිය සමිතිවල එකතුවෙන් හැදුණු සංවිධානයක් බව පෙන්වාදෙමින් ඔහු ප්‍රකාශ කළේ තම සංවිධානය නියෝජනය කරන වෘත්තීය ක්ෂේත්‍ර ගණනාවක වසංගත තත්වය නිසා ගැටලු මතු වී තිබෙන බවය.

සියළු වෘත්තීය ක්‍රියාමාර්ග ගෙන ඇත්තේ කොවිඩ්-19 වසංගතය නිසාම මතු වූ වෘත්තිය ගැටලු විසඳාගැනීමට බවත්, වැටුප් වැඩිවීම් ආදී ආර්ථික ඉල්ලීම් මේ මොහොතේ ඉදිරිපත් කර නොමැති බවත් ඔහු කීය.

උදාහරණයක් ලෙස බැංකු විවෘත කිරීමෙන් පසු සේවකයන් අතර කොවිඩ්-19 රෝගීන් වැඩි වශයෙන් හමුවෙන නිසා ආතතියක් පවතින බවත්, එන්නත් ලබා නොදීම සහ ගමනාගමන පහසුකම් පිළිබඳ එම ආතතිය පවතින බවත් ඔහු කීය.

සේවා කොන්දේසිවල ගැටලු, එන්නත් නොලැබීම, ගමනාගමන පහසුකම්, නිරෝධායන කාලසීමාවේ නිවාඩු ලබා නොදීම ආදි ගැටලු විසඳීමට ආණ්ඩුව අසමත් වන්නේ නම් වෘත්තිය ඉල්ලීම් සඳහා වන අරගල නතර නොවන බව ඔහු කීය.

ඉතිහාසය පුරා අත්‍යවශ්‍ය සේවා ලෙස නම් කිරීමේ නියෝගවලින් වෘත්තීය ක්‍රියාමාර්ග නතර කිරීමේ උත්සාහයන් ගෙන ඇති නමුත්, වෘත්තීය ක්‍රියාමාර්ග නතර කිරීමට ආණ්ඩුවලට හැකියාව ලැබී නොමැති බවත්, කෙතරම් යටපත් කිරීමට උත්සාහ කළත් වෘත්තීය අරගල උඩට මතු වන බවත් ඔහු කීය.

වැඩකරන ජනබලය සංවිධානය ජුනි 03 දිනැතිව නිකුත් කළ නිවේදනයේ අත්‍යවශ්‍ය සේවා නම් කරමින් වෘත්තීය අයිතීන් මර්දනය කළ ආකාරය පැහැදිලි කර ඇත. එම නිවේදනය මෙසේය.

‘කොවිඩ්-19 වසංගත තත්වය තුළ දැඩි අවදානමකට ලක්වෙමින් රෝගීන් සමග ඍජුව ගැටෙමින් කටයුතු කරන්නේ සෞඛ්‍ය සේවයේ කාර්ය මණ්ඩලයන්ය. එහෙත් ඔවුන්ට වසංගතයෙන් ආරක්ෂා වීමට අවශ්‍ය අවම පහසුකම් ලබාදීමට ආණ්ඩුව කටයුතු කර නැත. මේ හේතුවෙන් සෞඛ්‍ය කාර්ය මණ්ඩලවලද සැලකිය යුතු පිරිසකට මේ වන විට කොවිඩ්-19 ආසාදනය වී ඇත. මේ තත්වය මත හෙද, පරිපූරක වෛද්‍ය ඇතුළු සෞඛ්‍ය සේවයේ වෘත්තිය සමිති 24ක් ඒකාබද්ධව සෞඛ්‍ය කාර්ය මණ්ඩල සඳහා අවශ්‍ය පහසුකම් ලබාදීමට බල කිරීමේ වෘත්තීය ක්‍රියාමාර්ගයක් ප්‍රකාශයට පත් කර තිබුණි. ඒ අනුව ජුනි 03 දින පෙව 7.00 සිට 12.00 දක්වා පැය 5ක් සෞඛ්‍ය සේවකයන් සේවයෙන් බැහැර වීමට කටයුතු කර තිබුණි.

එසේම සෞඛ්‍ය සේවකයන් පිරිසක් මේ වන විට තම ඉල්ලීම් වෙනුවෙන් අඛණ්ඩ සත්‍යග්‍රහයකද නිරත වෙමින් සිටී.
එසේ වෘත්තිය ක්‍රියාමාර්ගයක් ප්‍රකාශයට පත් කර තිබියදී 2021 ජුනි 02 දිනැති 2230/9 අංකයෙන් යුතු අතිවිශේෂ ගැසට් නිවේදනය මගින් ජනාධිපතිවරයා විසින් සෞඛ්‍ය ඇතුළු සේවාවන් කිහිපයක් අත්‍යාවශ්‍ය සේවා බවට පත් කර ඇත. කොවිඩ්-19 වසංගතයෙන් ආරක්ෂාවීමට ක්ෂේත්‍ර ගණනාවක් විසින් එන්නත් ඉල්ලා සිටීම හා ග්‍රාම නිලධාරීන් විසින්එන්නත් ලබාදෙන ලෙස බල කරමින් වැඩවර්ජනයක් දියත් කළ අවස්ථාවේද මේ ආකාරයෙන්ම එම සේවා අත්‍යාවශය සේවා බවට පත් කිරීමට කටයුතු කරන ලදී. ඒ හේතුවෙන් එන්නත් නොලබාම ග්‍රාම නිලධාරීන්ගේ වැඩවර්ජනය නතර කෙරුණි.

වසර එකහමාරකට වැඩි කාලයක් මෙරට කොව්ඩ්-19 වසංගත තත්වය තුළ තම සේවාවන් අඛණ්ඩව සිදු කිරීමට සෞඛ්‍ය සේවයේ කාර්ය මණ්ඩල දැඩි කැපවීමකින් කටයුතු කළ අතර සෞඛ්‍ය සේවය අත්‍යවශ්‍ය සේවා බවට පත් කිරීමට කිසිදු අවශ්‍යතාවක් නොතිබුණි. ඒ තත්වය තුළ පැහැදිලි වන්නේ හදිසියේ මෙලෙස සෞඛ්‍ය සේවය අත්‍යන්‍ශ්‍ය සේවා කිරීම ඔවුන්ගේ වෘත්තිය ක්‍රියාමාර්ගය මර්දනය සඳහාම කරන ලද්දක් බවයි.

වෘත්තිය ක්‍රියාමාර්ග මර්දනය සඳහා යොදා ගත හැකි ප්‍රබලම ක්‍රියාමාර්ගය වී ඇත්තේ එම සේවාවන් අත්‍යවශ්‍ය සේවා බවට පත් කිරීමයි. තම සේවාවන්ගේ කටයුතු ක්‍රියාත්මක කිරීම වෙනුවෙන් අවශ්‍ය පහසුකම් සෞඛ්‍ය සේවකයන් විසින් ඉල්ලා සිටින විට එම ක්‍රමවේදය භාවිතා කරමින් ඔවුන්ගේ වෘත්තිය ක්‍රියාමාර්ග මර්දනය කිරීම බරපතල කණගාටුදායක තත්වයකි. සෞඛ්‍ය සේවකයන්ට කොවිඩ්-19 වසංගතයෙන් ආරක්ෂා වීමට අවශ්‍ය පහසුකම් ලබා නොදී මේ ආකාරයෙන් ඔවුන්ගේ වෘත්තිය අරගල මර්දනය කිරීම සම්බන්ධයෙන් වැඩකරන ජන බලය ලෙස අප දැඩි විරෝධය පළ කර සිටිමු.’■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි