No menu items!
19.9 C
Sri Lanka
29 March,2024

සෞඛ්‍ය බලධාරීන්ට නොදන්වා බේරුවල පවුලක් ඉවත් කරගෙන

Must read


බේරුවල ප‍්‍රදේශයේ සිව් දෙනෙකුගෙන් යුත් පවුලක සාමාජිකයන් ප‍්‍රදේශයේ ප‍්‍රධාන වෛද්‍ය නිලධාරියාට හෝ මහජන සෞඛ්‍ය පරීක්ෂකවරයාට නොදන්වා අපේ‍්‍රල් 05 වැනිදා ප‍්‍රදේශයෙන් පිටතට ගොස් ඇති බවත්, එම පවුලේ සාමාජිකයන් හමුදාවේ පිරිසක් සමග ප‍්‍රදේශයෙන් පිටවූ බව අසල්වැසියන් පැවසූ බවත් අනිද්දා වෙත අදහස් දැක්වූ බේරුවල ප‍්‍රධාන වෛද්‍ය නිලධාරී වෛද්‍ය වරුණ සෙනෙවිරත්න පැවසීය.


තමා දන්නා ඉහළ හමුදා නිලධාරීන් අමතා මේ ගැන තොරතුරු දැනගැනීමට උත්සාහ කළද, තමන්ට එම නිලධාරීන් සම්බන්ධ කරගැනීමට නොහැකි වූ බව වෛද්‍ය වරුණ සෙනෙවිරත්න වැඩිදුරටත් කීය. එම පවුල සිටින්නේ කොතැනකදැයි තමා නොදන්නා බවද ඔහු කීය.


බේරුවල ප‍්‍රදේශය අධිඅවදානම් කලාපයක් ලෙස නම්කොට සියලූ පවුල් සෞඛ්‍ය නිලධාරීන්ගේ නිරීක්ෂණය යටතේ නිරෝධායනයට යොමුකර ඇති අවස්ථාවක එහි සිටින සියලූ පවුල් පිළිබඳව තමන් හා මහජන සෞඛ්‍ය නිලධාරීන් වගකිව යුතු බවත්, එවැනි පසුබිමක එක් පවුලක් තමන්ට නොදන්වා ප‍්‍රදේශයෙන් ඉවත් කරගැනීම බරපතළ තත්වයක් බවත් ඔහු කීය. එක පවුලක් ඉවත් කරගැනීම ගැන ප‍්‍රදේශවාසීන් තමාට දෝෂාරෝපණය කරන නිසා ප‍්‍රදේශවාසීන් අතර විශ්වාසය පවත්වගැනීමටද මෙම තත්වය බලපාන බව ඔහු කීය.


තමා හමුදාව සමඟ සහයෝගයෙන් කටයුතු කරන නමුත්, මෙවැනි සිදුවීම් ගැන අසතුටට පත්වන බවත් හමුදාව යම් හේතුවක් මත පවුලක් ඉවත් කරගත්තේ නම් ඒ පිළිබඳව තමන්ට දැන්විය යුතුව තිබුණු බවත් පැවසීය.


ඒ පවුලේ කිසිවෙකුට කොරෝනා රෝගය ඇතැයි තමන්ට වාර්තා නොවූ බවත්, පවුලට සම්බන්ධ ඥාතියෙකුට රෝගය ඇතැයි වාර්තා වූ බවත් ප‍්‍රධාන වෛද්‍ය නිලධාරියා වැඩිදුරටත් කීය.


මේ පිළිබඳව කළ විමසීමකදී යුද හමුදා මාධ්‍ය ප‍්‍රකාශක බි‍්‍රගේඩියර් චන්දන වික‍්‍රමසිංහ පැවසුවේ බේරුවල ප‍්‍රදේශයේ පවුලක් 05 වැනිදා හමුදාව ඉවත් කර තිබුණේ එම පවුලට සම්බන්ධ අයෙකුට කොවිඞ්-19 රෝගය ඇතැයි තහවුරු වූ නිසා බවය. එම පවුලේ සාමාජිකයන් දියතලාව නිරෝධායන මධ්‍යස්ථානය වෙත ගෙනගිය බවද ඔහු කීය.


මාධ්‍ය ප‍්‍රකාශකවරයා වැඩිදුරටත් කීවේ සෞඛ්‍ය නිලධාරීන් හා මාධ්‍ය මෙවැනි සිදුවීම් පිළිබඳව වගකීම් සහගතව කටයුතු කළ යුතු බවයි. හමුදාව විශාල කැපවීමකින් කටයුතු කරමින් සිටින බවත්, මෙවැනි සිදුවීම් පිළිබඳව වැරදි දෘෂ්ටිකෝණයෙන් කරුණු සමාජගත කිරීම නුසුදුසු බවත් හමුදා මාධ්‍ය ප‍්‍රකාශකවරයා කීය. හමුදාවට ලැබෙන සංවේදී කරුණු මත ඇතැම් තීරණ ගන්නා බවද ඔහු පැවසීය.


කෙසේ වෙතත් දැනටමත් බේරුවල ප‍්‍රදේශය නිරෝධායන කලාපයක් ලෙස නම්කර තිබියදී නිරෝධායනය සඳහා එම පවුල දියතලාව වෙත ගෙනයෑමට හේතුව විමසුවද ඒ පිළිබඳව මාධ්‍ය ප‍්‍රකාශකවරයා පැහැදිලි කළේ නැත.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි