No menu items!
27.5 C
Sri Lanka
29 March,2024

සිංගප්පූරු- ශී‍්‍ර ලංකා වෙළෙඳ ගිවිසුම: අතිවිශේෂ ගැසට්එක අතුරුදහන්

Must read

 

සිංගප්පූරු- ශී‍්‍ර ලංකා නිදහස් වෙළෙඳ ගිවිසුම් පිළිබඳව විශේෂ අධ්‍යයනයක් සිදු කර වාර්තාවක් ලබාදීම සඳහා ජනාධිපති මෛතී‍‍පාල සිරිසේන විසින් විශේෂඥයන්ගෙන් සමන්විත කමිටුවක් අගෝස්තු 11 දින පත්කරනු ලැබූ බව ජනාධිපති මාධ්‍ය අංශය නිවේදනය කළේය. ජනාධිපති කාර්යාල වෙබ් අඩවියේද ඒ බව සඳහන් කර ඇත.

එම වෙබ් අඩවියට අනුව විවිධ පාර්ශ්වයන්ගෙන් ලැබුණ අදහස් සලකා බලා ජනාධිපතිවරයා විසින් එම කමිටුව පත්කර ඇති අතර සිංගප්පූරු-ශී‍‍්‍ර ලංකා වෙළෙඳ ගිවිසුමේ විෂය පථය අධ්‍යයනය කිරීම ඔවුන්ගේ කාර්යය වේ. එහිදී ශී‍්‍ර ලංකාවේ අනාගත වෙළෙඳ ප‍‍්‍රතිපත්තිය සකස් කිරීම සම්බන්ධයෙන් ප‍‍්‍රතිපත්ති හා මාර්ගෝපදේශ පිළිබඳ නිර්දේශ ලබා ගැනීමටද අපේක්‍ෂා කෙරේ. තවද සිංගප්පූරු-ශී‍‍්‍ර ලංකා වෙළෙඳ ගිවිසුමේ ප‍‍්‍රායෝගික බලපෑම හා භාවිතයන්ද එහිදී සලකා බැලෙනු ඇත.

එම කරුණු පිළිබඳව මාස දෙකක කාලයක දී ජනාධිපතිවරයාට වාර්තාවක් ලබාදිය යුතු අතර ඒ අතරතුර කාලයේදී අතුරු වාර්තා ලබාදිය යුතුය. කමිටුව කොළඹ විශ්වවිද්‍යාලයේ හිටපු උපකුලපතිවරයකු වූ ආර්ථික විද්‍යාව පිළිබඳ මහාචාර්ය ඩබ්ලිව්.ඞී. ලක්ෂ්මන්ගේ සභාපතිත්වයෙන් යුත් අතර සෙසු සාමාජිකයන් වන්නේ ආර්ථික විද්‍යාව පිළිබඳ මහාචාර්ය සිරිමෙවන් කොළඹගේ, ආර්ථික විද්‍යාව පිළිබඳ මහාචාර්ය අජිතා තෙන්නකෝන්, ආචාර්ය සනත් ජයනෙත්ති හා මහ බැංකුවේ හිටපු සහකාර අධිපතිවරයෙකු වූ ආර්.ඒ. ජයතිස්සය.

මෙහි උත්ප‍්‍රාසජනක කාරණය වන්නේ අදාළ සිංගප්පූරු- ශ‍්‍රී ලංකා නිදහස් වෙළෙඳ ගිවිසුම ජනාධිපති මෛත‍්‍රීපාල සිරිසේනගේ ප‍්‍රධානත්වයෙන් 2018 ජනවාරි 23 දින ජනාධිපති ලේකම් කාර්යාලයේදී අත්සන් තැබූ එකක් වීමය. ජනාධිපති කාර්යාල වෙබ් අඩවිය එම අත්සන් කිරීමේ අවස්ථාව වාර්තා කර ඇත්තේ ගිවිසුම අත්සන් කිරීමේ අවස්ථාවට ජනාධිපතිවරයාගේ ආරාධනයෙන් සිංගප්පූරු අගමැති ලී ෂියන් ලූ‍ සහභාගි වූ බව කියමින්ය. ජනාධිපතිවරයාත් සිංගප්පූරු අගමැතිවරයාත් ඉදිරිපිට එදින ගිවිසුමට අත්සන් කර තිබුණේ සංවර්ධන උපායමාර්ග හා ජාත්‍යන්තර වෙළෙඳ අමාත්‍ය මලික් සමරවික‍්‍රම සමඟ සිංගප්පූරුවේ වෙළෙඳ හා කර්මාන්ත අමාත්‍යවරයාය. ඒ අනුව ජනාධිපතිවරයාට මෙම ගිවිසුම පිළිබඳව ඔහුගේ අවබෝධය වැඩි දියුණු කරගැනීමට සිත්වී ඇත්තේ ඔහුගේ ප‍්‍රධානත්වයෙන්ම ගිවිසුම අත්සන් කර මාස හයකට පසුය. ජනාධිපතිවරයාට එම සිත් පහළ වීම සිදුවන අවස්ථාව එළඹෙන දිනවල එම ගිවිසුමට ප‍්‍රබලම ප‍්‍රහාරය එල්ල කරනු ලැබුයේ ඒකාබද්ධ විපක්ෂයේ බන්දුල ගුණවර්ධන මන්ත‍්‍රීවරයාය. ගුණවර්ධන මන්ත‍්‍රීවරයා මාධ්‍ය ඉදිරියට විත් ප‍්‍රකාශ කළේ සිංගප්පූරු-ශ‍්‍රී ලංකා වෙළෙඳ ගිවිසුමට අදාළ අතිවිශේෂ ගැසට් පත‍්‍රයක් මුද්‍රණය කිරීමේදී වංචාවක් සිදුකර ඇති බවය. ඒ එම ගැසට් පත‍්‍රයේ මුද්‍රණය කර ඇති එක් කොටසක් වසා මුද්‍රණය කර ඇති වෙනත් කොටසක් අලවා ඇති බවය.

බන්දුල ගුණවර්ධන මන්ත‍්‍රීවරයා පෙන්වා තිබූ එම අතිවිශේෂ ගැසට් පත‍්‍රය වන්නේ 2018 මැයි මස 01 දින අංක 2069/02 යටතේ නිකුත් කර තිබූ එකක්ය. එය නිකුත් කර ඇත්තේ වෙළෙඳ සහ ආයෝජන ප‍්‍රතිපත්ති පිළිබඳ දෙපාර්තමේන්තුව විසින්ය. අතිවිශේෂ ගැසට් පත‍්‍රයේ අරමුණ ආදායම් සංරක්ෂණ පනත යටතේ සිංගප්පූරු-ශ‍්‍රී ලංකා වෙළෙඳ ගිවිසුමට වරණීය තීරු බදු ප‍්‍රමාණයක් ප‍්‍රකාශයට පත් කිරීමය.
මාස තුනකටත් අධික කාලයක් ගතවීත් තවමත් එම අතිවිශේෂ ගැසට් පත‍්‍රයේ මුද්‍රිත පිටපතක් මහජනයාට ලබා ගැනීමට හැකියාවක් නැත.

අතිවිශේෂ ගැසට් පත‍්‍රයක මුද්‍රිත පිටපතක් මහජනයාට ලබාගැනීමට හැකි ආකාර දෙකක් පවතී. එකක් රජයේ මුද්‍රණ දෙපාර්තමේන්තුවේ වෙබ් අඩවියෙන් බාගත කරගෙන පිටපතක් ලබා ගැනීමය. දෙවැන්න රජයේ ප‍්‍රකාශන කාර්යාලයෙන් පිටපතක් ලබාග ැනීමය. එහෙත් එම ගැසට් පත‍්‍රය සම්බන්ධයෙන් එම හැකියාව තවමත් මහජනයාට නැත. රජයේ මුද්‍රණ දෙපාර්තමේන්තු වෙබ් අඩවියේ එහි මුද්‍රිත පිටපත තවමත් ප‍්‍රදර්ශනය කර නැත. රජයේ ප‍්‍රකාශන කාර්යාලයේ පිළිතුර වූයේද එහි පිටපත් තවමත් ඔවුන්ට නොලැබුණ බවය.

රජයේ මුද්‍රණාලයෙන් ඒ ගැන කරන විමසීමේදී ලැබුණ පිළිතුර වූයේ මුද්‍රණය කරන ලද එම අතිවිශේෂ ගැසට් පත‍්‍රයේ පිටපත් සියල්ල අමාත්‍යාංශය රැගෙන ගියා යන්නය. ඒ අනුව රජයේ මුද්‍රණයේ වෙබ් අංශයෙන් කළ විමසීමේදී ලැබුණ පිළිතුර වූයේ වෙබ් අඩවියේ පළකිරීම සඳහා ඔවුන්ට එය තවම ලැබී නැති බවය. රීඩින් අංශයෙන් (කියවීම් අංශය යැයි සිතමු. ) එය දැනගන්නා ලෙස දැන්විය. එම අංශයෙන් විමසීමේදී ලැබුණ පිළිතුර වූයේ ‘අපි රීඞ් කරලා යවලා තියෙන්නේ. ඔන්ලයින් බලන්න.’යනුවෙන්ය. නැවත වෙබ් අංශය ඇමතූ කල පිළිතුර වූයේ ඒ කට්ටිය හෙවත් අමාත්‍යාංශය සීඞී තැටියක මෘදු පිටපතක් නොඑවා ටේ‍්‍රසිං පිටපතක් එවීම නිසා එම තත්වය උද්ගතව ඇති බවය.
විවිධ හේතු වගකිවයුතු තැන්වලින් කීවද සිංගප්පූරු-ශ‍්‍රී ලංකා වෙළෙඳ ගිවිසුමට අදාළ අත්‍යවශ්‍ය අතිවිශේෂ එම ගැසට් පත‍්‍රය නම් මාස තුනක් ගතවීත් තවමත් අතුරුදන්ය. එම හේතුව එහි සැඟවිය යුතු රහස් තිබීමද?

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි