■ ඉඳුවර බණ්ඩාර
සපුගස්කන්ද තෙල් පිරිපහදුව තුළ තාප විදුලි බලාගාර ධාවනය සඳහා අවශ්‍ය නැප්තා ඉන්ධන වර්ගයේ කිසිඳු තොගයක් නැති බව එම බලාගාරයේ ඉහළ නිලධාරියකු අප කළ විමසීමකදී පැවසීය.
මේ අතර ජනවාරි 13 දින දහවලේ සිට රටේ විවිධ ප්‍රදේශවලට විදුලිය විසන්දි කිරීමට සිදුවූයේ ඩීසල් හා නැප්තා නොමැති වීමෙන් විදුලි බලාගාර ධාවනය කිරීමට නොහැකි වීම නිසා බව විදුලිබල මණ්ඩලය නිවේදනය කළේය. මෙසේ ඩීසල් හා නැප්තා නොමැති වීමෙන් ධාවනය කිරීමට නොහැකි වී ඇත්තේ කැලණිතිස්ස විදුලි බලාගාරයේ චක්‍රීය බලාගාරය සහ ජී 7 යනුවෙන් හඳුන්වන බලාගාරය බව ඒ සම්බන්ධයෙන් කළ විමසීමකදී විදුලි බල මණ්ඩලයේ ඉහළ නිලධාරියකු පැවසීය.
නැප්තා සපුගස්කන්ද බලාගාරය තුළින් බොරතෙල් පිරිපහදු කර ලබා ගන්නා අතර බොරතෙල් ගෙන්වීම සඳහා මුදල් නොමැතිකමින් දෙවන වරටත් එම බලාගාරය ජනවාරි 03 වැනිදා වසා දමනු ලැබීය. එමෙන්ම විදුලි බල මණ්ඩලයට ඩීසල් සැපයීමද මේ වනවිට ඛනිජ තෙල් සංස්ථාව නවතා දමා ඇත.
බලශක්ති අමාත්‍ය උදය ගම්මන්පිල මේ වනවිටත් ප්‍රකාශ කර ඇත්තේ විදුලි බල මණ්ඩලය සඳහා ඉන්ධන ලබාදීමට නම් මුදල් ගෙවිය යුතු බවයි. විදුලි බල මණ්ඩලය මේ වනවිට ඛනිජ තෙල් සංස්ථාවට රුපියල් බිලියන 90ක පමණ මුදලක් ගෙවීමට තිබේ.
ජල විදුලිය සීමා වන අවස්ථාවලදී උපරිම ලෙස තාප විදුලි ජනනය සිදුවන අතර ඒ සඳහා ඩීසල්, දැවි තෙල් හා නැප්තා යන වර්ග භාවිතා කරනු ලැබේ. කැළණිතිස්ස විදුලි බලාගාරයේ ඇති විදුලි ජනක යන්ත්‍ර කිහිපයක් මෙන්ම එම පරිශ්‍රයේ තිබෙන පෞද්ගලික බලාගාරද ඉන්ධන භාවිතයෙන් ධාවනයේ යෙදෙන අතර කෙරවලපිටයේ ඇති බලාගාරද ඉන්ධන භාවිතයෙන් ධාවනයේ යෙදේ. ඊට පරිබාහිරව තිබෙන අනිකුත් පෞද්ගලික බලාගාර මෙන්ම කොළඹ වරාය තුළ තිබෙන බාජ් බලාගාරයද ඉන්ධන භාවිතයෙන් විදුලි ජනනයන් සිදු කරයි.■
