No menu items!
26.1 C
Sri Lanka
28 March,2024

යුරෝපානු පාර්ලිමේන්තුව තීරණයක් අරන් තියෙනවා
ජීඑස්පී ප්ලස් සහනය ලංකාවට නොදී ඉන්න
දමිල ජාතික සංධානයේ පාර්ලිමේන්තු මන්ත්‍රී
එම්.ඒ.සුමතිරන්

Must read

ආණ්ඩුව හැම තිස්සේම හිතන් ඉන්නවා අපි දෙවන පන්තියේ ජන කොටසක් කියලා. දමිළ ජනතාව දෙවන පන්තියේ ප්‍රජාවක් හැටියට සැලකීම නිසායි මේක වෙලා තියෙන්නේ. සියලුම පුරවැසියන් සමානයි.

■ අමන්දිකා කුරේ

යුරෝපා සංගම් නියෝජිතයන් හා ඉන්දියානු රාජ්‍ය තාන්ත්‍රිකයන් කිහිපදෙනෙකු සමගම පසුගිය කාලයේ ඔබේ පක්ෂය සාකච්ඡා පැවැත්වුවා. සාකච්ඡා වුණු විශේෂ කරුණු මොනවාද?


මූලිකවම අපි කතා කළේ අපේ ජාතික ප්‍රශ්නය ගැන. ඒ වගේම අගමැති මහින්ද රාජපක්ෂ මහත්තයා ජනාධිපති වෙලා ඉඳපු කාලෙ, ඒ කියන්නේ යුද්ධෙ ඉවර වුණු ගමන් ම 2010-2011 කාලෙ කිව්වා 13 වන ව්‍යවස්ථා සංශෝධනය ක්‍රියාත්මක කරනවා කියලා. ඔහු කිව්වේ 13 වන සංශෝධනයේ තිබෙන කරුණුවලිනුත් එහාට ගිහින් ක්‍රියාත්මක කරනවා කියලා. එතුමාගේ කාලේ වගේම මෛත්‍රීපාල සිරිසේන මැතිතුමා ජනාධිපති කාලෙත් අපි දැඩි උත්සාහයක් ගත්තා 13 වන සංශෝධනය ක්‍රියාත්මක කරන්න. අපි උත්සාහ කරමින් ඉන්න කාලෙ ආණ්ඩුව දෙකට කඩලා ආණ්ඩුව පෙරළලා ලොකු ප්‍රශ්නයක් වුණා. ලංකාව 1987 ඉන්දු ලංකා ගිවිසුමෙන් ඉන්දියාවට පොරොන්දු වෙලා තියෙනවා මේ ජාතික ප්‍රශ්නයට විසඳුමක් දෙන්න. ආණ්ඩුව දැන්වත් ඉන්දියාවට දීලා තියෙන පොරොන්දු ඉටු කරන්න ඕනෑ කියන එක තමයි අපි ඉන්දියාව එක්ක ගත්ත සාකච්ඡාවල කතා වුණේ.

ඉන්දියාව හැර වෙනත් රටවල් උතුරු නැගෙනහිර සංවර්ධනය සඳහා අයෝජනය කිරීම ගැන මොකද හිතන්නේ?


අනිත් රටවල් ගැන කියනවාට වඩා ඉන්දියාව තමයි උතුරු නැගෙනහිර සංවර්ධනයට මූලිකවම ආයෝජන හා ප්‍රදානයන් සිදු කළේ. ඒ වගේම ඔවුන් ඉදිරියටත් සහාය දෙන්න බලාපොරොත්තු වෙනවා කිව්වා. අපිත් ඔවුන්ට සංවර්ධන ව්‍යාපෘති යෝජනා ඉදිරිපත් කරලා තියෙනවා. විශේෂයෙන්ම පලාලි ගුවන් තොටුපළ, කන්කසන්තුරේ වරාය, මන්නාරම වරාය හා ත්‍රිකුණාමල වරාය සම්බන්ධයෙන් අපේ යෝජනා අපි ඔවුන්ට ඉදිරිපත් කරලා තියෙනවා. ඒ වාගේම ජනතාවට සහන දෙන ව්‍යාපෘතිවලටත් අපි ඉල්ලීම් කරලා තියෙනවා.

පහුගිය කාලේ ඇමති උදය ගම්මන්පිල කිව්වා ත්‍රිකුණාමල තෙල් ටැංකි සංකීර්ණය ඉන්දියාවට දීලා තියෙන බව. එහි ඇත්ත තත්වය මොකක්ද?


තෙල් ටැංකි සංකීර්ණය ඉන්දියාවට පවරලා දීලා නෑ. නමුත් 1987 ඉන්දු-ලංකා ගිවිසුමෙන් ලංකාව හා ඉන්දියාව එකඟතාවකට ඇවිල්ලා තියෙනවා තෙල් ටැංකි සම්බන්ධයෙන් යම් අවබෝධයක් ඇතිව කටයුතු කරනවා කියලා. ඒ තෙල් ටැංකි වෙනත් රටකට හෝ සමාගමකට දෙනවා නම් ඉන්දියාවට ඒ සම්බන්ධයෙන් අවබෝධයක් හදන්න ඕනෑ. එහෙම නැතිව ඉන්දියාවට පවරා දීලා නෑ.

එක්සත් ජාතීන්ගේ සමුළුවෙදි ජනාධිපතිවරයා ඩයස්පෝරාවට සාකච්ඡා කරන්න ආරාධනා කළා. ඔබ ඒ ගැන දකින්නේ කොහොමද?


ඩයස්පෝරාවට සාකච්ඡා කරන්න එන්න කියන එක හොඳයි. නමුත් මේ අය යම් සැලසුමක ඉඳන් කටයුතු කරනවා කියන එක පැහැදිලියි. තාමත් ඩයස්පෝරාව ලංකාවේ තහනම්නෙ. තහනම් කරලා තියෙද්දි ඔවුන් කොහොමද සාකච්ඡාවකට එන්නෙ. ඔවුන් එක්ක කතා කරන්න කලින් අපි එක්කවත් කතා කරන්න පුළුවන්නෙ ජනාධිපතිවරයාට. ඇත්තටම මේ ජාතික ප්‍රශ්නය සම්බන්ධයෙන් සාකච්ඡා කරන්න ඕනෑ. සාකච්ඡා කරලා දේශපාලන විසඳුමකට එන්න ඕනෑ ප්‍රශ්නයක් මේක.

පළාත් සභා ඡන්දය ඉදිරියේ පවත්වන බවට ආණ්ඩුව පහුගිය දවස්වල ප්‍රකාශ කළත් තවම ඒ ගැන ආණ්ඩුවේ සූදානමක් නෑ. මේ ගැන ඔබේ අදහස මොකක්ද?


පළාත් සභා ඡන්දය වහාම තියන්න ඕනෑ. මේ ගැන මම පාර්ලිමේන්තුවේදී පෞද්ගලික මන්ත්‍රී යෝජනාවක් හැටියටත් යෝජනා කළා. නීතිපතිතුමා පළාත් සභා ඡන්දය පැවැත්වීම සම්බන්ධයෙන් ආණ්ඩුවට උපදෙස් දීලා තියෙන්නේ. ආණ්ඩුව ඒ සංශෝධන මොකුත් නැතිව කරගෙන යන්න හදන්නේ. ආණ්ඩුවට දැන් ඡන්දෙකට එන්න අමාරුයි. ඒකයි තවම කල් දදා ඉන්නේ.

පළාත් සභා ක්‍රමය ක්‍රියාත්මක වීමේ අවශ්‍යතාව ඔබ දකින්නේ කොහොමද?


ලංකාවේ ජාතික ප්‍රශ්නයක් තියෙනවා. එතකොට ඒ අනුව බලය බෙදන්න ගෙනාව ක්‍රමයක් තමයි පළාත් සභා ක්‍රමය කියලා කියන්නේ. මේ තියෙන ප්‍රශ්න විසඳන්න තියෙන වැදගත් දේශපාලන විසඳුමක් ඒක. ඒ නිසා ඒ ක්‍රමය අනිවාර්යයෙන්ම ක්‍රියාත්මක කළ යුතුයි.

පසුගියදා අනුරාධපුර බන්ධනාගාරයේ සිරකරුවන්ට තර්ජනය කිරීමේ සිද්ධියේ මේ වන විට තත්වය මොකක්ද?


මේ වෙනකොට මූලික අයිතිවාසිකම් පෙත්සම් සලකා බලලා අධිකරණය අතුරු නියෝගයක් දීලා තියෙනවා පොලිස්පතිට වහාම පරීක්ෂණයක් කරන්න කියලා. ඒ කටයුතු වෙන්නේ කොහොමද කියලා අපි බලන් ඉන්නවා.

දේශපාලන සිරකරුවන් නිදහස් කරගැනීම හා අතුරුදන්වූවන් සම්බන්ධයෙන් දෙමළ ජාතික සන්ධානය ඉදිරියට කරන්න බලාපොරොත්තු වෙන්නේ මොනවාද?


අපි මේ ගැන ආණ්ඩුව එක්ක කතා කළා. ඒ වගේම අධිකරණ ඇමති එක්කත් සාකච්ඡා කළා. අතුරුදන්වූවන් පිළිබඳ කාර්යාලය දැන් කිළිනොච්චිවල ආපහු පටන්ගෙන තියෙනවා. නමුත් ඒවායේ වැඩ සිද්ධ වෙන්නේ අපිට එකඟ වෙන්න පුළුවන් විදිහට නෙවෙයි. දැන් තියන්නේ නිකන් වන්දියක් දෙන එක විතරයි. අපි කියන්නේ මේ ආයතන ක්‍රියාත්මක වෙලා මේ දේවල් ගැන පරීක්ෂණ කරන්න ඕනෙ.

යාපනයේ පැවති තිලීපන් සමරුවෙදි පාර්ලින්මේන්තු මන්ත්‍රීවරයෙක් ඇතුළු පිරිසක් අත්අඩංගුවට ගත්තා. මියගිය අය සිහිකරන එකට ආණ්ඩුව දිගටම බාධා කිරීම ගැන ඔබ මොකද හිතන්නේ?


මිය ගිය අය සමරන්න අයිතියක් තියෙනවා. ජාත්‍යන්තර නීතියක් කියලා දෙයක් තියෙනවා. අපි ආණ්ඩුවට කියනවා ජාත්‍යන්තර නීති උල්ලංඝනය කරන්න එපා කියලා. මේක ඉතාම නීති විරෝධී වැඩක්. ඒ නිසා ඒ සම්බන්ධයෙන් අපි ඉදිරියට නීතිමය ක්‍රියාමාර්ග ගන්න බලාපොරොත්තු වෙනවා.

ත්‍රස්තවාදය වැළැක්වීමේ පනත යොදාගෙන තවමත් උතුරු නැගනහිර ආණ්ඩුව විසින් සිදුකරන මර්දන ගැන අදහස මොකක්ද?


ආණ්ඩුව හැම තිස්සේම හිතන් ඉන්නවා අපි දෙවන පන්තියේ ජන කොටසක් කියලා. දමිළ ජනතාව දෙවන පන්තියේ ප්‍රජාවක් හැටියට සැලකීම නිසායි මේක වෙලා තියෙන්නේ. සියලුම පුරවැසියන් සමානයි. ඒ නිසා සමාන අයිතිවාසිකම් තියෙන්න ඕනෑ කියන එක නැතිව තමයි මේ දේවල් වෙන්නේ. අපට තාම අපේ අයිතීන්වත් හරියට දීලා නෑ.

ත්‍රස්තවාදය වැළැක්වීමේ පනත ඉදිරියේදී ආණ්ඩුව අහෝසි කරයිද? සංශෝධනය කරයිද?
අනිවාර්යෙන්ම ආණ්ඩුව ත්‍රස්තවාදය වැළැක්වීමේ පනත අහෝසි කළ යුතුයි. 2017 දී එවකට හිටපු ආණ්ඩුව යුරෝපානු පාර්ලිමේන්තුවට පොරොන්දුවක් දුන්නා ත්‍රස්තවාදය වැළැක්වීමේ පනත අහෝසි කරනවා කියලා. ඊට පස්සේ තමයි ජීඑස්පී ප්ලස් සහනය ලංකාවට ලැබුණේ. ඊට පස්සේ ඒ ඉඳපු ආණ්ඩුවටත් මේක ඉටු කරන්න බැරි වුණා. දැන් ඉන්න ආණ්ඩුවත් එක කරලා නෑ. ඒ නිසා යුරෝපානු පාර්ලිමේන්තුව දැන් තීරණයක් අරන් තියෙනවා ජීඑස්පී ප්ලස් සහනය තවදුරටත් ලංකාවට නොදී ඉන්න.


මේ පනත අහෝසි කළ යුතුයි. ඊට පස්සේ අවශ්‍ය නම් ජාත්‍යන්තර නීති හා සම්මුතිවලට ගැළපෙන විදිහට නව පනතක් හදාගන්න පුළුවන්.

විශාල සෞඛ්‍ය හා ආර්ථික අර්බුදයක් රට හමුවේ තිබියදීත් ආණ්ඩුව මෙවරත් අයවැයෙන් වැඩිම මුදල හමුදාව නඩත්තුවට වැය කරලා තියෙනවා. මේ ගැන ඔබ දකින්නේ කොහොමද?


අපි නිතරම ඔය ගැන විරෝධය පළකරලා තියෙනවා. පාර්ලිමේන්තුවේදීත් අපේ මන්ත්‍රීවරු මේ ගැන කතා කරලා තියෙනවා. යුද්ධය ඉවරවෙල දැන් අවුරුදු 12කට වැඩියි. එහෙම තියෙද්දිත් තවමත් වැඩිම මුදලක් හමුදාවට වෙන් කරන්නේ ඇයි? දැන් අපි හැමෝටම පැහැදිලි කාරණය තමයි මේ ආණ්ඩුව හමුදා පාලනයක් ගෙනයන්නේ කියන එක. ඒකට අවශ්‍ය මුදල් තමයි ඔය වෙන් කරගන්නේ.

නැවත වතාවක් තැන් තැන්වලින් බෝම්බ හමුවෙනවා. ආණ්ඩුව මේ උත්සාහ ගන්නේ යළිත් වතාවක් රට භීතියට පත්කරන්න ද?


ඇත්තටම අපි ඒවා ගැන ඉතාම අවධානයෙන් ඉන්න ඕනෑ. පාස්කු ඉරිදා ප්‍රහාරයේ අන්තිමට මොකද වුණේ. පාස්කු ඉරිදා ප්‍රහාරය පෙන්නලා මේකට රටට බලධාරී කෙනෙක් පත්වෙන්න ඕනෑ කියලා, අපිට මේක පුළුවන් කියලා බොරු පොරොන්දු දීලා ආණ්ඩුව බලය ගත්තා. ඒ නිසා මේ සිදුවීම් වෙන්නේ යම් හේතුවක් ඇතිව. ඒ නිසාමයි අපි ඒවා ගැන අවධානයෙන් සිටිය යුතු වන්නේ.

අවසාන වශයෙන් ඔබට මොනවාද කියන්න තියෙන්නේ?


අපි දැන්වත් එක රටක් විදිහට ඉස්සරහට යන්න ඕනෑ. හැම ජනකොටසකටම සමාන ලෙස සලකන්න ඕනෑ. ආණ්ඩුක්‍රම ව්‍යවස්ථා සංශෝධනයෙන් බලය බෙදීමට ලබා දීලා තියෙන විසඳුම අර්ථවත් කරන්න ඕනෑ. එහෙම නැතිව වෙන වෙන දේවල් කරලා වැඩක් නෑ.


දැන් සිවිල් පුද්ගලයන්ව අපි ජීවත් වන ප්‍රදේශවල බලෙන් පදිංචි කරවනවා. මේවායින් වෙන්නේ තවත් ප්‍රශ්න ඇතිවෙන එක. සාමය ඇතිකරන්න නම් අපි සාකච්ඡා කරලා දේශපාලන විසඳුම්වලට එන්න ඕනෑ. අපි හැමෝම එකඟ වෙන විසඳුම්වලටයි එන්න ඕනෑ. එහෙම ආවොත් තමයි අපිට ඒ රටක් හැටියට ඉස්සරහට යන්න පුළුවන් වෙන්නේ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි