No menu items!
29.7 C
Sri Lanka
29 March,2024

මුස්ලිම් ජනතාව පීඩාවට පත්කළ ආණ්ඩුවේ විශේෂඥ කමිටු ප්‍රෝඩාව

Must read

  • මේ අවලස්සන සෙල්ලම රටේ මුස්ලිම් ජනතාවට එරෙහිව චේතනාන්විතවම කළ දෙයක් හැටියට පිළිගන්නට අපට සිදුවෙයි

■ කේ. ඩබිලිව්. ජනරංජන

ආණ්ඩුව හදිසියේම කෝවිඩ් වැළඳී මියයන මුස්ලිමුන්ගේ දේහ භූමදානය සඳහා අවසර දෙන්නට යයි. බදාදා පාර්ලිමේන්තුවේදී, එස්එම් මරික්කාර් පාර්ලිමේන්තු මන්ත්‍රීවරයා නැගූ ප්‍රශ්නයකට කෙටි පිළිතුරක් දුන් අගමැති මහින්ද රාජපක්‍ෂ, සිරුරු භුමදාන කරන බව කිව්වේය.
මේ ප්‍රකාශය නිසා බලවත් ලෙස පමාවී හෝ මුස්ලිම් ජනතාවට, සිය මළසිරුරු භූමදානය කිරීමට අවසර ලැබීම ගැන අපට සතුටු විය හැකිය. එහෙත්, ඒ අවසරය ඉස්මත්තට ගෙන එම ප්‍රකාශය නිසාම පැනනගින බලවත් ප්‍රශ්න ගණනාවක් නොඅසා සිටිය නොහැකිය.
එක ප්‍රශ්නයක් නම්, ආණ්ඩුව මේ තීරණයට එළැඹියේ වසංගත පිළිබඳ කුමන විශේෂඥ කමිටුවේ නිර්දේශයට අනුවද යන්නය. සෞඛ්‍ය අමාත්‍යාංශය යටතේ එවැනි එක් විශේෂඥ කමිටුවක් පිහිටුවා තිබුණු අතර, එම කමිටුව දිගින් දිගටම කියා සිටියේ කෝවිඩ් මළසිරුරු භූමදානයෙන් පස සහ ජලය දූෂණය වන බවයි. අගමැතිවරයා පාර්ලිමේන්තුවේදී මේ ප්‍රකාශය කරන විටදීත් ඒ දැඩි මතයෙන් වෙනස් මතයක් එම විශේෂඥ කමිටුවෙන් ඉදිරිපත් වී තිබුණේ නැත. මහාචාර්ය ජෙනිෆර් පෙරේරාගේ නායකත්වයෙන් යුක්ත, මහාචාර්ය නිලීකා මද්දුමගේද ඇතුළත්, තවත් විශේෂඥ කමිටුවක් තිබුණු අතර, මළසිරුරු භූමදාන හෝ ආදාහනය කළ හැකි බව එම කමිටුවෙන් නිර්දේශ කළේය. එහෙත්, ආණ්ඩුව කීවේ එම කමිටුවට කිසිම බලයක් නැති බවයි. එනිසා එහි නිර්දේශ පිළිගන්නට තමන් බැඳී නැති බවයි. ඉන් පසුව, ආණ්ඩුවට හිතවත් විද්‍යුත් මාධ්‍යද මේ කමිටුවට පන්න පන්නා පහර දුන්නේය.
මුල් විශේෂඥ කමිටුව භූමදානයට නිර්දේශයක් කර නැති පසුබිමක, රාජපක්‍ෂ අගමැතිවරයා කී තීරණය ගත්තේ කාගේ නිර්දේශය පිටද? එය වෛද්‍ය විශේෂඥ කමිටුවක තීරණයක් නොවන දේශපාලන තිරණයක්ද? එම දේශපාලන තීරණය ගත්තේ කවුද? එම තීරණය ගන්නට බලපෑ හේතු මොනවාද? බදාදා ගත්තේ දේශපාලන තීරණයක් නම්, එය මීට පෙර ගන්නට නොහැකි වුණේ ඇයි? එවැනි තීරණයක් නොගෙන, මුස්ලිම් ජනතාව මහත් පීඩනයකට ලක්කළේ ඇයි? ඒ පීඩාව වෙනුවෙන් ආණ්ඩුව මුස්ලිම් ජනතාවගෙන් සමාව ගත යුතු නොවේද?
මහින්ද රාජපක්‍ෂ මහතා පාර්ලිමේන්තුවේදී දැනුම් දුන් තීරණය ගත්තේ දේශපාලන තීන්දුවක් හැටියට නම්, ආණ්ඩුවේ මේ අවලස්සන සෙල්ලම රටේ මුස්ලිම් ජනතාවට එරෙහිව චේතනාන්විතවම කළ දෙයක් හැටියට පිළිගන්නට අපට සිදුවෙයි. එය, පසුගිය නිදහස් දිනයේද ගෝඨාභය රාජපක්‍ෂ ජනාධිපතිවරයා අවධාරණය කළ පරිදි, සිංහල බෞද්ධ ජනාධිපති කෙනකු සිටින සිංහල බෞද්ධ ආණ්ඩුවක්, රටේ සුළුතර ජනතාවට එරෙහිව කරන ලද පළිගැනීමක් හැටියට සැලකිය හැකිය. පළිගැනීම, 2019 නොවැම්බරයේදී ගෝඨාභය රාජපක්‍ෂ මහතා දිනවන්නට ඡන්දය පාවිච්චි නොකිරීමය.
ආණ්ඩුවට මේ තීරණය ගන්නට සිදුවන්නේ කුමන තත්වයක් යටතේද? එකක් නම්, මළසිරුරු අනිවාර්ය ආදාහනය සඳහා ආණ්ඩුවේ තීරණයට එරෙහිව සිංහල, දෙමළ, මුස්ලිම් සියලු ප්‍රගතිශීලී ජනයා අතරින් වර්ධනය වන විරෝධයක් දකින්නට තිබීමය. මුලින් මුලින් නිශ්ශබ්දව සිටි මුස්ලිම් ජනතාව පසුව වීදි බසින්නට පටන්ගත්හ. අනතුරුව මේ සතියේ උතුරේ පැවැත්වුණු පීඇන්ඩ්පී නමින් හැඳින්වුණු දැවැන්ත ජනතා පෙළපාලිය, ආණ්ඩුවට එරෙහි බලවේග එකතුවන අයුරු පෙන්වන කැඩපතක් බඳු විය. මුස්ලිම් භූමදාන අයිතිය වෙනුවෙන්, දෙමළ, හින්දු, කතෝලික සුළුතර ජනතාව මහත් උද්යෝගයෙන් වීදියට බැස තිබුණි. ආණ්ඩුවේ තීරණය, විවිධ වෙනස්කම් ඇති මහජනතාවක් එකට එකතු කරන්නට සමත් වී තිබිණ. මේ ප්‍රවණතාව රටේ අනෙක් ප්‍රදේශ කරාද පැතිර යන්නට ඉඩ ඇති බවට සාධාරණ බියක් ආණ්ඩුවට තිබෙන්නට ඇත.
අනෙක් අතින්, පෙබරවාරි 22වැනිදා ජිනීවාහි එක්සත් ජාතීන්ගේ මානව හිමිකම් කවුන්සිලයේ 46වැනි සැසිවාරය ඇරඹෙයි. එහිදී ලංකාව සිටින්නේ බලවත් අවදානම් සහිත තැනකය. ලංකාව සම්බන්ධයෙන් කවුන්සිලයට යෝජනාවක් ඉදිරිපත් වන බවද, එය මිෂෙල් බැෂලේ මහකොමසාරිස්වරියගේ වාර්තාව මත පදනම් වන බවද, ලංකාව සම්බන්ධ ‘කෝ ගෲප්’ එක වෙනුවෙන් දැනටමත් කවුන්සිලයට නිල වශයෙන් දන්වා තිබේ. ලංකාවේ මුස්ලිම් මළසිරුරු භූමදානයට අවසර නොදීම, මිෂෙල් බැෂලේගේ වාර්තාවේ විශේෂයෙන්ම සඳහන් කර තිබිණ. ඒ නිසා ආණ්ඩුව ජිනීවාහිදී ඇඟේ සුදුහුණු ගාගන්නට කළ දෙයක් හැටියටද මෙය හඳුන්වන්නට පිළිවන. කෙසේ වෙතත්, මතක තබාගත යුත්තේ, ආණ්ඩුවේ තීරණය සිය ඉරණම හැටියට බාරනොගෙන, මුස්ලිමුන් ප්‍රමුඛව රටේ සියලු ජනවාර්ගික ප්‍රගතිශීලී ජනතාව දැක්වූ විරෝධයේ ප්‍රතිඵලයක් හැටියට භූමදාන අයිතිය ප්‍රමාදවී හෝ දෙන්නට ආණ්ඩුව පරාජිත තත්වයට වැටුණු බවය. ■

 

මුස්ලිම් විරෝධීන්ට මොකක් වෙයිද?

තමන් වෙත ඇති ඉස්ලාමොෆෝබියාව හෙවත් නිදන්ගත ඉස්ලාම් භීතිකාව නිසා, මුස්ලිමුන් පීඩනයට පත්කිරීමේ මාර්ගයක් වශයෙන්, ආණ්ඩුවේ විශේෂඥ කමිටුවේ මතය නම් ලජ්ජාසහගත ප්‍රෝඩාව උපුටා දැක්වූ විශාල පිරිසක් පසුගිය කාලයේ වූහ. සියලුම නිකායයන්වල පාහේ නායක, අනුනායක භික්‍ෂූන්, දේශපාලකයන්, වෛද්‍යවරුන්ද ඇතුළත් විවිධ තරාතිරම්වල ජාතිකවාදීහුද අතිවිශාල සංඛ්‍යාවක් මුස්ලිමුනට එරෙහිව කර තියාගෙන ගියේ, ‘විශේෂඥයො කියන විදියට තමයි අපි වැඩ’ කියන පාඨයයි.
දැන් විශේෂඥ කමිටු බොරුවේ හුළං බස්සවනු ලැබ ඇත්තේ රාජපක්‍ෂවරුන්ම විසිනි. ඉතින්, මෙතෙක් කල් එය කර තබාගෙන ගිය පිරිසගේ ඉරණම කුමක් වේද? විශේෂයෙන් අස්ගිරි පාර්ශ්වයේ මුල් පුටු හොබවන භික්‍ෂූන්, මල්වතු පාර්ශ්වයේ ද්වීතිය පෙළට අදාළ භික්‍ෂූන් ඇතුළු, ‘රටට තිබිය යුත්තේ එක නීතියයි. එය විශේෂඥයන් කරන නිර්දේශ මත පදනම් විය යුතුමයි’ කියන ව්‍යාජය කර තබාගෙන ගියවුන් සියල්ලන්ම, රාජපක්‍ෂවරුන් විසින් පොළවට සමතලා කර තිබේ. පත්කළ ආණ්ඩුවේ නායකයන්, ඔවුන් මතුර මතුරා සිටි මන්ත්‍රය එක මොහොතකින් පාවාදී තිබේ. රාජපක්‍ෂවරුන් වැනි දේශපාලකයන්ට, මේ මොහොතේ එකක්, ඊළඟ මොහොතේ තව එකක් යනාදි මතවාදී රූපාන්තරණයන් හුරුපුරුදු නමුත්, ජාතිකවාදය නිසා හෝ එක මතයක සිටි හැට නව ලක්‍ෂයක ජනතාවට නම් එවැනි කටුසු හැසිරීම් පුරුදු නැති බව පැහැදිලිය. එහෙත්, ආණ්ඩුව සහ එහි නායකයන් මේ ස්ථිර මතයක් දරන පොහොට්ටු පාක්‍ෂික ජන තීරුව බලවත් අවුලකට ඇද දා තිබේ.
කෙටියෙන් කිවහොත්, ආණ්ඩුව පත්වී තිබෙන්නේ. තමන්ගේ ස්ථාවර වෙනස්වීම ගැන තමන්ට ඡන්දය දුන් හැට නව ලක්‍ෂය ඉදිරියේවත් සාධාරණය කරන්නට නොහැකි තත්වයකටය. ආණ්ඩුව බලය සඳහා ඕනෑ ද්‍රෝහිකමක් කරන්නකු හැටියට ඔවුන් අඳුනගනීවිද?■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි