No menu items!
27.5 C
Sri Lanka
29 March,2024

මාධ්‍යවේදීන් අවුරුදු දෙකක්
හිරේ දැම්මාට වරදක් නෑ
ඉරිදා ලංකාදීප කර්තෘ ආරියනන්ද දොඹගහවත්ත

Must read

ශ්‍රී ලංකා පුවත්පත් මණ්ඩල නීතිය යටතේ ජනමාධ්‍යවේදීන්ට අවුරුදු දෙකක සිරදඬුවම් පැමිණවීමේ වරදක් නැතැයිද, එය වරදක් ලෙස තමා දකින්නේ නැතැයිද ඉරිදා ලංකාදීප පුවත්පතේ ප්‍රධාන කර්තෘ හා ශ්‍රී ලංකා කර්තෘ සංසදයේ සාමාජික ආරියනන්ද දොඹගහවත්ත පවසයි. ඒ මහතා එසේ පැවසුවේ, ශ්‍රී ලංකා පුවත්පත් මණ්ඩල ආචාර ධර්ම සංග්‍රහයට අවුරුදු හතළිහක් පිරීම සැමරීම සඳහා ඔක්තෝබර් 14 වැනිදා, රජයේ ප්‍රවෘත්ති දෙපාර්තමේන්තු ශ්‍රවණාගාරයේදී පැවැති උත්සවයක දේශනයක් කරමිනි.

ශ්‍රී ලංකා කර්තෘ සංසදයේ දීර්ඝ කාලීන ස්ථාවරය වන්නේ ශ්‍රී ලංකා පුවත්පත් මණ්ඩලය නීතිය අහෝසි කළ යුතු බවයි. සිය දේශනය කරමින් ඔහු වැඩිදුරටත් කීවේ, තමාද කර්තෘ සංසදයේ සාමාජිකයෙකු වන නමුත් හරි දේ හරි හැටියටත්, වැරදි දේ වැරදි හැටියටත් කියන්නට තමාට හැකි බවයි. ‘පුවත්පත් මණ්ඩලය අහෝසි කිරීමට කීම පසුපස දේශපාලනයක් තිබෙන බවද, එය එක්කනෙකුගේ දෙන්නෙකුගේ වුවමනාවට සිදුවන දෙයක් බව’ද දොඹගහවත්ත මහතා කීවේය.


ඔහු වැඩිදුරටත් මෙසේද කීවේය.


‘පුවත්පත් ආචාර ධර්ම පිළිබඳව කතාකරනකොට ප්‍රශ්නයක් මතුවෙලා තියෙන්නේ පුවත්පත් මණ්ඩලය. පුවත්පත් ආචාර ධර්ම තිබිය යුතුයි, පුවත්පත් මණ්ඩලය නොතිබිය යුතුයි කියන අදහස තමයි දැන් ලංකාව තුළ මතුවෙලා තියෙන්නේ. පුවත්පත් මණ්ඩලය අවශ්‍ය නෑ කියන හේතුව පසුපස දේශපාලනයක් තියෙන බව මා හිතනවා.


කර්තෘ සංසදය කියන දෙයක් තමයි පුවත්පත් මණ්ඩල පනත තුළ නෛතික රාමුව දැඩි විදියට තියෙනවා, එයින් අවුරුදු දෙකක සිරදඬුවමක් පනවන්න පුළුවන් කියලා. මං අහන්නේ පුවත්පත් කලාවේදීන්ට එහෙම දඬුවම් දීම වරදක්ද? දඬුවම් දීම වරදක් නෙවෙයි. මම දකිනවා ඒක වරදක් නෙවෙයි කියලා. හේතුව මොකද, පුවත්පතකට පුළුවන් මිනිහෙක් ඇතිකරන්නත් නැතිකරන්නත්. තුවක්කුවට පුළුවන්කම තියෙන්නේ මිනිහෙක් නැති කරන්න විතරයි. නමුත් පෑනට මිනිහෙක් නැති කරන්නත් පුළුවන්, ඇතිකරන්නත් පුළුවන්.


පුවත්පත් කලාවේදීන් සතුව තියෙන ඒ ප්‍රබල අවිය වැරදි විදියට පාවිච්චි කළොත් මොකද වෙන්නේ? රිලවාට වඳුරාට කඩුව දුන්නාට පස්සේ ඒ කඩුවෙන් හැම තැනම ගහගෙන යනවා නම් මහ විනාශකාරී තත්වයක් ඇතිවෙන්නේ. කඩුව දෙන්න ඕන ශික්‍ෂණයක් සහිත කෙනෙකුට. මම දැන් අවුරුදු හතළිහක් විතර මේ පත්තර කලාවේ ඉන්නවා. පහුගිය කාලය තුළ අපි දැක්ක දෙයක් තමයි, මේ ආචාර ධර්ම කඩකරමින් අශ්ශීල විදියට පුවත්පත්වල වැඩ කරපු පිරිස්. හේතුව මොකද? පුවත්පත් කලාවේදීන්ට කිසිම නිශ්චිත පුහුණු වැඩපිළිවෙළක් නැත. ජනමාධ්‍යත් සංවේදී විෂයක්. ඒකෙ හරි මිනිස්සු හිටියෙ නැත්නම් එතැන සිදුවෙන්නේ මහා විනාශකාරී තත්වයක්.’


‘වෘත්තිකයන් සඳහා නිවැරදි ආයතන අපේ රටේ පිහිටුවලා තියෙනවා. මාධ්‍යවේදීන් සඳහා මොකක්වත් නැහැ. මාධ්‍යවේදීන්ට කිසිදු පුහුණුවක් නැහැ. දිගුකාලීන අත්දැකීම් හරහා තම මාධ්‍යවේදියෙක් ගොඩනැගෙන්නේ. ඒක වැරදිම දෙයක්. ආචාර ධර්ම රැකෙන මාධ්‍යවේදියෙක් නිර්මාණය කරන්න තියෙන්නේ ඔහු නිවැරදි අධ්‍යාපනය ලබන පුහුණු මිනිසෙක් බවට පත්කළොත් විතරයි.’


‘කර්තෘ සංසදයේ බොහෝ දෙනෙක් කියන දෙයක් තමයි පුවත්පත් මණ්ඩලය වැනි නෛතික රාමුවේ තියෙන ආයතනයක් නැතුව අපේ ආචාරධර්මත් එක්ක ස්වයං වාරණයක් තියාගෙන වැඩ කටයුතු කරමු කියලා… නෛතික රාමුවක් පිළිබඳ කතාකරද්දී දණ්ඩ නීතිය කියන එක තියෙන්න ඕනෑ. අපේ දෙතිස්වධ තිබුණ නිසා තමයි ඒ කාලේ රැකුණේ. නැතිනම් ඉවරයි. අපි ඇවිල්ලා එහෙම දියුණු ප්‍රජාතන්ත්‍රවාදී සමාජයක පිරිසක් නෙවෙයි. එහෙම දියුණු ප්‍රජාතන්ත්‍රවාදයක් අපිට තිබුණා නම් කිසිම ප්‍රශ්නයක් නැහැ. මාධ්‍යවේදීන් කියන්නෙත් සමාජයෙම එක කොට්ඨාසයක්. නැතුව සුපිරි පිරිසක් නෙවෙයි. පුවත්පත් මණ්ඩලයට විරුද්ධත්වය පාන්න හේතුව පුද්ගලයකුගේ දෙන්නෙකුගෙ අභිමතාර්ථයක්. ප්‍රශ්නයක්. ඒක වෙනම කතන්දරයක් කියන්න ඕන දෙයක්. පුද්ගලයකුගෙ දෙන්නෙකුගෙ ප්‍රශ්නයකට මේ වගේ රටේ සංවේදී විෂයකට බලපාන ආයතනයක් නැතිකරන්න දෙන්න පුළුවන්කමක් නැහැ.’ යැයිද දොඹගහවත්ත මහතා පැවසීය.


ශ්‍රී ලංකා පුවත්පත් මණ්ඩලය විසින් සංවිදධනය කරන ලද මේ සැමරුම් උත්සවය, ජනමාධ්‍ය අමාත්‍ය ඩලස් අලහප්පෙරුම හා පුවත්පත් මණ්ඩලයේ සභාපති මහින්ද පතිරණගේ ප්‍රධානත්වයෙන් පැවැත්විණ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි