No menu items!
19.6 C
Sri Lanka
29 March,2024

නීතිඥ සංගම් සභාපති නිලවරණය බෙදීම් ඇවිස්සීමට එරෙහි අතුල්පහර

Must read

ශ්‍රී ලංකා නීතිඥ සංගමයේ 2021-22 වසර සඳහා සභාපතිවරයා තෝරාගැනීම සඳහා පැවැති නිලවරණය, 24වැනි දා නිමාවිය. ජනාධිපති නිීතිඥ සාලිය පීරිස් ඡන්ද 5093ක්ද, ජනාධිපති නීතිඥ කුවේර ද සොයිසා ඡන්ද 2707ක්ද ලබාගත්හ. සාලිය පීරිස් මහතාගේ වැඩි ඡන්ද ප්‍රමාණය, 2386ක් වන අතර, එය කුවේර ද සොයිසා මහතා ලබා ගත් මුළු ඡන්ද ප්‍රමාණයට වඩා අඩුවන්නේ හුදෙක් 321කිනි. එහි තේරුම, පරාජිතයා ලබාගත් ඡන්ද ප්‍රමාණයට ආසන්න වශයෙන් දෙගුණයක් ජයග්‍රාහකයා ලබාගෙන ඇතිය යන්නය.
මෙවර

නීතිඥ සංගම් නිලවරණය ගැන විවිධ අර්ථවිග්‍රහ මේ වන විටත් සමාජ මාධ්‍ය හා වෙනත් ආකාරයෙන් එළිදකිනු පෙනේ. ඒවායේ ඇති සමහර නිරීක්‍ෂණ, නීතිඥ සංගමය හැටියට සැලකූ කල කිසිම පදනමක් නැති හුදු හිතලු හැටියටද දැක්විය හැකිය.
කෙසේ වෙතත් මෙවර නිලවරණ ක්‍රියාදාමය, පැවැත්වුණේ කෝවිඩ් 19 ව්‍යාප්ත වීමේ රැල්ලක් මැදය. ඒ නිසා හැකි තරම් උපරිමයෙන් සෞඛ්‍යාරක්‍ෂක පිළිවෙත් පිළිපැදීම අත්‍යවශ්‍ය විය. දිවයිනේ සෑම අධිකරණ කලාපයකම දිසා අධිකරණවලදී, ඒ ඒ කලාපයේ සාමාජිකයන්ට ඡන්දය පාවිච්චි කළ හැකිවීම නීතිඥ සංගමයේ විශේෂත්වයයි. එහෙත් වැඩි නීතිඥ ගහනයක් සිටින්නේ කොළඹ කේන්ද්‍ර කරගෙන නිසා කොළඹ නිලවරණ විධිවිධාන වැදගත්ය. නිලවරණය භාරව සිටි නීතිපති දෙපාර්තමේන්තුවේ සොලිසිටර් ජෙනරාල් සංජේ රාජරත්නම් හා ඔහුගේ කාර්ය මණ්ඩලය එහිදී සිය වගකීම ඉතාම ඉහළින් ඉටුකර තිබුණු බව ඔවුන්ට කරන ගෞරවයක් ලෙස සටහන් කර තැබිය යුතුය. පරිගණක තාක්‍ෂණය හැකි උපරිම ආකාරයෙන් යොදානිමින්, කිසිම අවස්ථාවක අවුලක් ඇති නොවන පරිදි ඔවුන් කටයුතු පිළියෙල කර තිබුණි.

එහෙත්, නීතිඥ ප්‍රජාවේ හැසිරීම් තුළ සෞඛ්‍යාරක්‍ෂක පිළිවෙත් රැකුණාදැයි කිසිවකුට සාධාරණ ප්‍රශ්නයක් පැනනැගීම ස්වාභාවිකය.
මේ නිලවරණ ක්‍රියාදාමය, නීතිඥ සංගම් ඉතිහාසයේ අතිශය විවේචනයට ලක්වූ එකක් හැටියට සැලකිය හැකිය. මෙතෙක් කිසිදා නිලවරණයකදී නොදුටු ප්‍රචාරක පිළිවෙත් හා ක්‍රියාකාරකම් නිසා, සාමාන්‍යයෙන් නිලවරණයකදී දක්නට ලැබෙන සියලු ආචාර ධර්ම කෙළෙසෙන බවට කනිෂ්ඨ ජ්‍යෙෂ්ඨ භේදයකින් තොරව සාතිශය බහුතර නීතිඥවරු/වරියෝ චෝදනා කරන්නට වූහ. අනෙක් අතට, ජාතික දේශපාලනයේ තිබෙන සියලු කුණුකසළ නීතිඥ සංගමයේ නිලවරණය තුළටද මහා පරිමාණයෙන් ගෙන ඒමට සභාපතිධුරයට තරග කළ එක් පාර්ශ්වයක අනුගාමිකයෝ උත්සාහ කළහ.
නීතිඥ සංගමය යනු, ලංකාවේ සියලුම නීතිඥවරුන්/වරියන් හුදෙක් සිය නීතිඥ දිවුරුම දීම නිසාම සාමාජිකත්වය ලබන සංගමයකි. හෙවත් සියලු නීති වෘත්තිකයන්ගේ එකම වෘත්තික සංගමයයි. ඒ තුළ විවිධ මට්ටමේ සේවාදායකයන් වෙනුවෙන් පෙනීසිටින නිීතිඥවරු, උසාවි තේරාවලියේ හැම උසාවියකම පෙනීසිටින නීතිඥවරු, උසාවි නොගොස් විවිධ වෘත්තීන්හි යෙදෙන නීතිඥවරු ඈ මෙකී නොකී විවිධාකාර ක්‍ෂෙත්‍රවල කටයුතු කරන නීතිඥවරු සිටිති. එපමණක් නොව සියලු ආගම්වලට, සියලු ජාතීන්ට, සියලු වර්ගයන්ට, සියලු කුලවලට අයත් නීතිඥවරු/වරියෝ එහි සාමාජිකයෝ වෙති. වැදගත්ම කාරණය මේ බෙදීම් කිසිවක් නොසලකා නීතිඥ සංගමය මේ සියලු වෘත්තිකයන්ට ඡත්‍රයක් වැනි සංගමයක් වීමයි.
මෙවර නිලවරණ ක්‍රියාදාමයේ කැපී පෙනුණු දේ නම් ජාතිවාදය, ආගම්වාදය, ප්‍රාදේශීයවාදය මෙන්ම නිර්ලජ්ජිත ලෙස කුලවාදයද අවුස්සමින් නීතිඥයන් අතර විවිධාකාර බෙදීම් ඇතිකර, ඡන්දය ලබාගැනීමට එක් පාර්ශ්වයක් ගත් පහත් උත්සාහයයි. එහිදී ප්‍රතිවාදී අපේක්‍ෂකයා රට පාවාදෙන්නකු යැයිද, ඔහු ලංකාවේ යුද වීරයන් පාවාදෙන්නට සැකසූ ජාත්‍යන්තර කුමන්ත්‍රණයක කොටස්කරුවකු වන බටහිර ගැත්තකු යැයිද, කිසිම ආගමකට නැත්තකු යැයිද, විසමාචාර චෝදනා ලැබුවකු යැයිද, ඔහු සභාපති වුවහොත් රට කෑලි කෑලිවලට කැඩී ගොස්, ජාත්‍යන්තර බලවේගවලට යටත් වන්නේ යැයිද, රණවිරුවන් විදුලි පුටුවට ගෙනයනු ඇතැයිද ආරෝපණය කරන ලදි. ඒ සඳහා නිර්නාමිකව සමාජ මාධ්‍ය හා වෙනත් ක්‍රම ඔස්සේ බරපතළ ප්‍රචාරක ව්‍යාපාරයක් ගෙන යන ලදි. ඊට අමතරව, ප්‍රාදේශීය නීතිඥ සංගම්වලට මෙතෙක් නොවූ විරූ ආකාරයෙන් යහමින් මුදල් හා වෙනත් උපකරණ ආදිය නොමිලේ බෙදාදීම කරන ලදි. විවිධ සුබසාධන වැඩ කරන ලදි. ආගමික භක්තියෙන් පටන්ගෙන, හිටපු නීතිඥ සංගම් ප්‍රධානීන් තමන්ට සහාය දෙන බවට ව්‍යාජ ප්‍රචාර යැවීම දක්වා සියලු වැරදි පිළිවෙත් නිලවරණය සඳහා භාවිත කරන ලදි. කෝවිඩ් ආසාදිත නීතිඥයන්ට රජයේ රෝහල්වල වෙනම වාට්ටුවක්, තීරු බදු රහිත වාහන, ජ්‍යෙෂ්ඨ නීතිඥවරුන්ටෙ ජනාධිපති නීතිඥ අභිධාන ලබාදෙන බවට පොරොන්දු දෙන ලදි. මේ ක්‍රියාදාමය සඳහා අතිශය විශාල මුදලක් වියදම් කරන බව පැහැදිලිව පෙනෙන්නට තිබුණු අතර, පොරොන්දු, මුදල්, ප්‍රතිපාක්‍ෂිකයාට ව්‍යාජ චෝදනා එල්ලකිරීම් හරහා නීතිඥවරුන්ගේ ඡන්දය ලබාගත හැකියැයි එම පාර්ශ්වය දැඩිව කල්පනා කළ බව පෙනේ.
එහෙත්, ඔවුන්ට ජයගත හැකි නොවීය. අතිවිශාල වැඩි ඡන්ද සංඛ්‍යාවකින් සාලිය පීරිස් මහතා ජය ගැනීමෙන් පෙන්වන්නේ, ඒ සියලු උත්සාහයන් නීතිඥ සංගමයේ සාතිශය බහුතරය විසින් ප්‍රතික්‍ෂෙප කරනු ලැබ ඇති බවයි. සියලු බෙදීම් අවුස්සා වෘත්තිකයන්ගේ ඡන්දය ලබාගැනීමට ගත් නිහීන උත්සාහයට එරෙහි බලවත් අතුල් පහරක් සෑම ආකාරයකම නීති වෘත්තිකයන් විසින් එල්ල කරනු ලැබ ඇති බවයි. එපමණක් නොවේ, අනාගතයේදීද මෙවැනි අශ්ලීල නිලවරණ ක්‍රියාදාමයක කිසිම අපේක්‍ෂකයකු නොයෙදිය යුතුයැයි අනතුරු අඟවා ඇති බවයි.
වැදගත් දෙයක් තිබේ. මේ නිලවරණයේදී ආණ්ඩුව, විශේෂ මැදිහත්වීමක් නොකිරීමයි. පොදුජන පෙරමුණේ ලේකම්වරයා ඇතුළු පිරිසක් පරාජිත අපේක්‍ෂකයාට පක්‍ෂයේ සහාය ලබාගැනීමට යම් උත්සාහයක යෙදුණා මිසක, ආණ්ඩුව දේශපාලන වශයෙන් මැදිහත්වීමක් නොකළේය. ප්‍රාදේශීය වශයෙන් එවැනි උත්සාහයක යෙදුණු තැන්වලදීද එය අසාර්ථක විය.
වැදගත්ම කාරණය ජයග්‍රාහි පීරිස් මහතාගේ පාර්ශ්වය තුළ සියලු ආගම්, ජාති, වර්ග, කුල හා දේශපාලන අදහස් දරන්නන් භේදයකින් තොරව ඒකරාශීව සිටීමයි. ආණ්ඩුවේ ඉහළම උදවියගේ නීතිඥවරුන් හැටියට කටයුතු කරන වෘත්තිකයන් පවා සිටියේ සාලිය පීරිස් මහතාගේ පාර්ශ්වයේය. පීරිස් මහතා දිනවීමට, ඒ සියලු පිරිස එකාවන්ව මහන්සි වූ බව පෙනුණි. ඒ නිසා, පීරිස් මහතාගේ ජයග්‍රහණය, ආණ්ඩු විරෝධීන්ගේ රැල්ලක ජයග්‍රහණයක් හැටියට හුවා දක්වන, අමුතු සුළඟක් හමන බව පෙන්වන නිර්වචන හාස්‍යයෙන් බැහැර කළ හැකිය. මෙය රාජපක්‍ෂලාගේ දැවැන්ත ඇදවැටීමක් ලෙස ලියන කියන දේද, නීතිඥ සංගමයට අදාළකමක් නැත.
එහෙත්, වැදගත් දෙයක් තිබේ. සාලිය පීරිස් මහතා වෙනුවෙන් බොහෝ පිරිස් එකතු වුණේ ඔහුගේ පෞද්ගලික ප්‍රියමනාපකම, නිරහංකාරකම වැනි ගූණ නිසා පමණක් නොවේ. පසුගිය කාලය පුරාම සිය වෘත්තීය ජීවිතයේදී, නීතියේ පාලනය, අධිකරණයේ ස්වාධීනත්වය, මිනිස් අයිතිවාසිකම්, මානව ගරුත්වය වෙනුවෙන් ඔහු ක්‍රියාවෙන්ම කර ඇති දායකත්වය හා කැපවීම නිසාය. ඔහුට ඡන්දය දුන් සාතිශය බහුතරය, ඒ වටිනාකම් සමාජය තුළ අස්පර්ශනීයව පවතිනවා දකින්නට රිසියෝය. ඒවාට අභියෝගයක් වන විටක, නීතිඥ සංගමයද සමග සාලිය පීරිස් මහතා ඒ අභියෝගයන්ට එරෙහිව පෙනීසිටිනු ඇතැයි විශ්වාස කරන්නෝය. නීතිඥයන්ට වරදාන, වරප්‍රසාද, වාහන ලබාදීමට වෙහෙසෙනු වෙනුවට ඉහත ප්‍රමිතීන් පවත්වාගැනීම වෙනුවෙන් ඔහු අඛණ්ඩව පෙනීසිටිනු ඇතැයි සියල්ලෝ විශ්වාස කරති.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි