පිරිසක් පවසන්නේ කුරුණෑගල රෝහලේ වෛද්‍යවරයෙකු වඳ සැත්කම් 4000ක් කර ඇතැයි මේ වෙද්දී සාක්ෂි සහිතව ඔප්පු වී ඇති බවය. කතා දෙකක් නැත. මේ වෙද්දී සාමාන්‍ය සිංහල සමාජයේ විශාල පිරිසක් ඉදිරිපත් කර ඇති සාක්ෂිවලින් සෑහීමට පත්වෙමින් මුස්ලිම් ජාතිකයන් සිංහල ජාතිය වඳ කරන්නට පැය විසිහතරේ සැලසුම් කරන්නේය යන සැකය තහවුරු කරගෙන ඇත. අපේ මේ උත්සාහය සාක්ෂි සහිතව ඔප්පු වී ඇතැයි කියන මේ කතාවේ තියෙනවායැයි කියන සාක්ෂි එකිනෙක ලිහාගැනීමය.
දිවයින පුවත
මැයි 23 වැනිදා දිවයින පුවත්පතෙහි හේමන්ත රන්දුණු ලියා තිබුණු ප‍්‍රධාන පුවතේ ‘තවුහිද් ජමාත් දොස්තර සිංහල මවුවරුන් හාරදහසක් වඳකරලා’ යැයි සඳහන් කර තිබුණි. එම වෛද්‍යවරයා පිළිබඳ සාක්ෂි සහිතව තොරතුරු හෙළිදරව් වී තිබෙන බවත්, වෛද්‍යවරයා අල්ලන්නට පොලීසියෙන් පුළුල් පරීක්ෂණ සිදුකරන බවත් සඳහන් කර තිබුණි. සූක්ෂ්ම ලෙස පැලෝපීය නාලය ගැටගසා වඳකිරීම් කර ඇතැයි එම පුවතෙහි තිබුණි.
මෙම පුවත්පත පිටවූ දිනයේම උදේ වරුවේ පොලිස් මාධ්‍ය ප්රකාශක රුවන් ගුණසේකරගෙන් කළ විමසීමකදී ඔහු කියා තිබුණේ මෙම පුවත බැලූ බැල්මටම ව්‍යාජ එකක් බවය. කාන්තාවන් වඳභාවයට පත්කළ වෛද්‍යවරයෙකු පිළිබඳව කිසිදු පරීක්ෂණයක් නොකරන බව ඔහු කියා තිබුණි. එහෙත් ඉන්පසුව ඔහු වෙනත් මාධ්‍ය වෙත කියා තිබුණේ කාන්තාවන් වඳභාවයට පත්කළ වෛද්‍යවරයෙකු ගැන කිසිදු පරීක්ෂණයක් නැතත්, වෙනත් වෛද්‍යවරයෙකු පිළිබඳව පොලීසිය පරීක්ෂණයක් කරමින් පවතින බවය. එය වෙනත් පරීක්ෂණයක් බවය. ඒ ප‍්‍රකාශයෙන් පසුව අපරාධ පරීක්ෂණ දෙපාර්තමේන්තුවට දිවයින පුවත පිළිබඳ විශේෂ විමර්ශනයක් බාරදී තිබුණි. ඒ මේ පුවතෙන් කියන ආකාරයේ සිදුවීමක් ඇතිදැයි සොයා බැලීමටය. මුලින්ම අප එක් කාරණයක් පැහැදිලිව තේරුම් ගත යුතුය. දිවයින පුවත අසත්‍ය එකකි. එහි එක් වෛද්‍යවරයෙකු කළායැයි කියන සිසේරියන් සැත්කම් සංඛ්‍යාවත් වඳ සැත්කම් සංඛ්‍යාවත් නිශ්චිතව බෙදා වෙන්කොට ප‍්‍රවෘත්තියෙහි දත්ත ඉදිරිපත් කර තිබුණි. දිවයින පුවත්පත ප‍්‍රකාශ කළ නිශ්චිත කරුණු සැබෑවක් නම් මව්වරුන් 4000කගේ දත්ත යම් පරීක්ෂණ අංශයක් සතුව තිබිය යුතුය. එසේ නැතිනම් වෛද්‍යවරයා හෝ මේ පිළිබඳ තොරතුරු හොඳින් දන්නා අයෙකු මේ ගැන පොලිසියට විධිමත් කටඋත්තරයක් ලබාදී තිබිය යුතුය. දිවයින පුවත ලියද්දී ඒ දෙකම තිබී නැත. ඒ වෙනුවට කවුරුන් හෝ කටවචනයෙන් කී දෙයක් ප‍්‍රධාන ප‍්‍රවෘත්තියක් බවට පත් කර ඇත. මේ මොහොත වෙද්දී තහවුරු වී ඇත්තේ ඒ පුවතෙහි තිබෙන කරුණු බොහොමයක් අසත්‍ය ඒවා බවය.
සියාබ්දීන් සාෆි
එහෙත් දිවයිනේ පුවත පිළිගන්නා අය මේ කරුණු ඉදිරිපත් කිරීමෙන් නැවැත්විය නොහැක. කුරුණෑගලදී අත්අඩංගුවට ගත් වෛද්‍ය සියාබ්දීන් සාෆි අත්අඩංගුවට ගත්තේ මන්දැයි ඔවුහු විමසන්නෝය. ඇත්තෙන්ම ඔහු අත්අඩංගුවට ගෙන තිබුණේ වඳසැත්කම් කතාවකට නොවේ. වෙනත් කාරණයකටය.
වෛද්‍ය සියාබ්දීන් සාෆි කුරුණෑගල වැව රවුමේ රියෝ ගොඩනැගිල්ලට ඉදිරිපිටින් පිහිටි කෝටි 13 ක වටිනාකමකින් යුත් ඉඩමක් මිලදී ගෙන තිබිණි. එම ඉඩම මිලදී ගැනීමට තවත් ව්‍යාපාරිකයෙකු බලාපොරොත්තුව සිට ඇත. කුරුණෑගල දිස්ත‍්‍රික්කය සිංහල බෞද්ධ ජාතිකවාදයේ ප‍්‍රමුඛ කඳවුරක් බව ප‍්‍රසිද්ධ කාරණයකි. කුරුණෑගල නගරයේ සිංහල ව්‍යාපාර සංගමය නම් සංවිධානයක් ශක්තිමත්ව ඇත. ඉහත කී ඉඩම මිලදී ගැනීමට උත්සාහ කර තිබුණේ කුරුණෑගල සිංහල ව්‍යාපාර සංගමයේ සාමාජිකයෙකි. ඉඩම අලෙවි කළ පුද්ගලයාද සිංහල ජාතිකයෙකි. සිංහල ව්‍යාපාර සංගමය නම් කණ්ඩායමේ එක් ප‍්‍රධාන අරමුණක් වී තිබුණේ මුුස්ලිම් ජාතික ව්‍යාපාරිකයන්ට ඉඩම් හා ව්‍යාපාර ස්ථාන අලෙවි නොකිරීමය. මුස්ලිම් අයට ඉඩම් නොදීම මේ වෙද්දී රටේ බොහෝ අය ප‍්‍රසිද්ධියේ ආඩම්බරයෙන් කරන අන්ත ගෝත‍්‍රිකවාදී ක‍්‍රියාවක් බවත් පිළිකුලෙන් ලියා තැබිය යුතුය. මෙම සංගමයේ බොහෝ අය කුරුණෑගල මලියදේව විද්‍යාලයේ ආදි ශිෂ්‍යයෝය. ප‍්‍රදේශයේ ඉහළම පොලිස් නිලධාරියෙක්ද මලියදේව විද්‍යාලයේ ප‍්‍රකට ආදි ශිෂ්‍යයෙකි.
ඉඩම සිංහල ජාතිකයෙකුට නොදී මුස්ලිම් ජාතිකයෙකුට ලබාදීම නිසා එයට එරෙහිව යමක් කිරීමේ අරමුණෙන් ඉහත කී පොලිස් නිලධාරියාගේ සහාය ව්‍යාපාරිකයන් පිරිසක් ඉල්ලා ඇති අතර, එහි ප‍්‍රතිඵලයක් ලෙස මුස්ලිම් වෛද්‍යවරයා අයථා වත්කම් උපයා ඇති බවට චෝදනා කරමින් විමර්ශනයක් ආරම්භ කර ඇත. පොලිස් මාධ්‍ය ප‍්‍රකාශකවරයා පසුව කී විමර්ශනය එයයි. ඒ විමර්ශනය යටතේ වෛද්‍ය සාෆි වහා අත්අඩංගුවට ගැනීමේ සැලසුමක් තිබී නැති බව පොලිස් ආරංචි මාර්ගවලින් වාර්තා වෙයි.
වෛද්‍ය සාෆි අයථා ලෙස වත්කම් උපයා නැතැයි අපට කිව නොහැකිය. ඔහු කෝටි ගණනක දේපළක් මිලදී ගත්තේ කෙසේදැයි අපි නොදන්නෙමු. ඔහුට අයත්ව කුරුණෑගල දිස්ත‍්‍රික්කයේ වෛද්‍ය රසායනාගාර තුනත් තිබෙන අතර, ඔහු අනෙක් සියලූ වෛද්‍යවරුන් මෙන් කුරුණෑගල දිස්ත‍්‍රික්කයේ පෞද්ගලික වෛද්‍ය සේවයේද යෙදෙන්නෙකි. එහෙත් මෙලෙස කෝටි ගණනක දේපල තිබෙන වෙනත් වෛද්‍යවරුන්ද ඕනෑ තරම් අප දන්නා බව පමණක් කිව හැකිය. ඕනෑ නම් රජයේ වෛද්‍ය නිලධාරීන්ගේ සංගමයේ ඉදිරිපෙළ වෛද්‍යවරුන්ගේ දේපළ ගැන සොයා බැලිය හැකිය.
අපට කියන්නට ඇති වැදගත්ම කාරණය නම් මේ වෛද්‍යවරයා අත්අඩංගුවට ගෙන තිබුණේ වඳ සැත්කම් 4000ක් පිළිබඳ සැකය නිසා නොවන බවය. වඳ සැත්කම් 4000ක කතාව ආවේ අප ඉහත කී පොලිස් නිලධාරියා දිවයින මාධ්‍යවේදියාට ¥රකථනයෙන් කී කතාවක් නිසා බවය. මාධ්‍යවේදියා සමඟ ඉහත කී පොලිස් නිලධාරියා මේ කතාව කියන්නට ඇත්තේ පරීක්ෂණවලින් ලැබුණු තොරතුරු නිසා නොවන බව දැනට පැහැදිලි වී තිබේ. ඒවා ගැන සොයාබලන්නේ නැතිව කෙනෙකු යමක් කී විගස පුවත් පළකිරීම දිවයිනේ මාධ්‍ය භාවිතාවය. ඒ ගැන වෙනම කතාකළ යුතුය.
කෙසේ වෙතත් අත්අඩංගුවට ගත් වෛද්‍ය සාෆි සීඅයිඞීයට බාරදී තිබුණි. ඒ සීඅයිඞීයෙන් දිවයින පුවත ගැනද පරීක්ෂණයක් කරන නිසාය. එහෙත් වෛද්‍යවරයා අත්අඩංගුවට ගෙන තිබුණේ අයථා වත්කම් පිළිබඳ චෝදනා මතය. අයථා වත්කම් පිළිබඳ විමර්ශනය කිරීම පොලිස් දෙපාර්තමේන්තුවට අයත් වගකීමක් නොවන අතර එය අල්ලස් හෝ ¥ෂණ විමර්ශන කොමිසමේ වගකීමකි.
සැත්කම් ප‍්‍රමාණය
කුරුණෑගල රෝහලේ අධ්‍යක්ෂ සරත් වීරබණ්ඩාර මාධ්‍ය සාකච්ඡුාවක් පවත්වමින් තමා සිසේරියන් සැත්කම් 8000ක් කර ඇතැයි වෛද්‍ය සාෆි තමන්ට පැවසූ බව කියා තිබුණි. එමෙන්ම වෛද්‍ය සාෆි පිළිබඳව එක් පැමිණිල්ලක් ලැබී සතියක් ගතවී ඇතැයි කියා තිබුණි. ඔහු පැවසූ කරුණු අනුව වසර ගණනාවක් තිස්සේ සේවයේ සිටි වෛද්‍ය සාෆි ගැන ඊට පෙර පැමිණිලි ලැබී නැත.
ඊට අමතරව 2018 පෙබරවාරියේ පැවති පළාත් පාලන මැතිවරණයට පෙර වෛද්‍ය සාෆි පුවත්පතකට සාකච්ඡුාවක් ලබාදෙමින් තමන් සිසේරියන් සැත්කම් 8000ක් සිදුකර ඇති බව කියා තිබුණි. එමෙන්ම පැය දෙකක් තුළ සැත්කම් අටක් කළ බවද එම වෛද්‍යවරයා මාධ්‍ය සාකච්ඡුාවේදී කියා තිබේ. ඒ ප‍්‍රකාශ දෙකම මැතිවරණයේදී හැකි තරම් ඡුන්ද ගන්නට අපේක්ෂා කරන අපේක්ෂකයෙකුගේ ප‍්‍රකාශ බව සිහි තබාගත යුතුය.
මේ කතාවලට සාපේක්ෂව කුරුණෑගල ශික්ෂණ රෝහලේ වාර්ෂිකව කරන සිසේරියන් සැත්කම් ප‍්‍රමාණය සැසඳිය යුතුය. එහි මෑත වර්ෂවල සිසේරියන් සැත්කම් පිළිබඳ දත්ත නැත. එහෙත් 2013 ට පෙර වාර්ෂික දත්ත ඇත. ඒවා අනුව වසරකට සිසේරියන් සැත්කම් පන්දහසකට ආසන්න ප‍්‍රමාණයක් කුරුණෑගල ශික්ෂණ රෝහලේදී සිදු කරන්නේය.
කුරුණෑගල ශික්ෂණ රෝහලේ නිල වෙබ් අඩවියෙහි 2013 දක්වා දත්ත වාර්තා ඇත. එහි වාර්ෂික සිසේරියන් සැත්කම් ප‍්‍රමාණයද ඇත. ඒ අනුව සිසේරියන් සැත්කම් 4953ක් 2012 වර්ෂයේදී කර ඇත. 2013 වර්ෂයේදී සිසේරියන් සැත්කම් 5135ක් කර ඇත. එහෙත් ඒ සැත්කම් කර ඇත්තේ අංශ තුනකින්ය. 2012 දී පළවැනි අංශයේ සැත්කම් 2435 කි. දෙවැනි අංශයේ සැත්කම් 1478කි. තෙවැනි අංශයේ සැත්කම් 1040කි. 2013 දීි පළවැනි අංශයේ සැත්කම් 2423 කි. දෙවැනි අංශයේ 1397 කි. තෙවැනි අංශයේ 1315 කි.
මේ සැත්කම් සියල්ල කරන්නේ එක් වෛද්‍යවරයෙක් නොවේ. කුරුණෑගල රෝහල වෛද්‍යවරුන් 250කට වැඩි සංඛ්‍යාවක් සිටින ශික්ෂණ රෝහලකි. මාතෘන් පිළිබඳ අංශයේ සිටින්නේ වෛද්‍ය සාබ්දීන් පමණක් නොවන අතර සාමාන්‍යයෙන් මෙවැනි අංශයක වෛද්‍යවරයෙකු සැත්කම් කරන්නේ සතියට දින දෙකකි. එපමණක් නොව මේ තිබෙන්නේ සිංහල බෞද්ධ මව්වරුන් පිළිබඳ දත්තද නොවේ. මේ දත්ත අනුව, එක් අංශයක වාර්ෂික සැත්කම් ප‍්‍රමාණයෙන් අඩක් වෛද්‍ය සාෆි කළායැයි විශ්වාස කළත් වෛද්‍යවරයාට සැත්කම් අටදහසක් කරන්නට වසර ගණනාවක් ගතවනු ඇත. ඒ සම්පූර්ණ කාලය තිස්සේ එකුදු මවකටවත් වෛද්‍ය පරීක්ෂාවකින් තමන්ගේ පැලෝපීය නාලය අවහිර කර ඇති බව දැනගන්නට නොහැකි වුණේ මන්දැයි වෙනම විමසිය යුතුය.
කාර්ය මණ්ඩලය
අනෙක් ප‍්‍රශ්නය වසර ගණනාවක් තිස්සේ මෙසේ හොරෙන් වඳ සැත්කකම් කළායැයි කියන මුස්ලිම් වෛද්‍යවරයාට නිදැල්ලේ කටයුතු කරන්නට ඉඩ දී රෝහලේ කාර්ය මණ්ඩලය නිහඬව සිටීමය. අධ්‍යක්ෂවරයාද නිහඬව සිටීමය. ඇත්තෙන්ම රෝහල් අධ්‍යක්ෂවරයා ඇතුළු කාර්ය මණ්ඩලය මේ චෝදනාවෙහි චුදිතයන්ය. මුස්ලිම් වීම නිසාම එක් අයෙකු විතරක් මෙහි චුදිතයා කිරීම පුදුම සහගතය.
ඇත්තෙන්ම කුරුණෑගල ශික්ෂණ රෝහලේ කාර්ය මණ්ඩලය මේ චෝදනාව තමන්ට එල්ලවූ චෝදනාවක් ලෙස සැලකිය යුතුය. එහෙත් මේ වෙද්දී රෝහල් කාර්ය මණ්ඩලය මේ වෛද්‍යවරයාට පමණක් එරෙහිව අවි අමෝරාගෙන සිටියි. එහෙත් වෛද්‍ය සාෆි කළේ තුවාලවලට බෙහෙත් දැමීම නොවේ. සිසේරියන් සැත්කම්ය. මේ කියන විදියට ශල්‍යාගාරයට ඇතුළුවෙද්දී නිර්වින්දන කාර්යය, සැත්කම් කටයුත්ත, හෙද කාර්යය ආදි සියල්ලම කළ සහාය නිලධාරීන් මවගේ පැලෝපීය නාලය අවහිර කරන තෙක් එක්කෝ දෑස් වසාගෙන සිටියා විය යුතුය. නැත්නම් ඔවුන් වෛද්‍ය සාෆිට සහාය පළකළා විය යුතුය. ඒ අනුව මේ චෝදනාව ගැන පරීක්ෂණ කරනවා නම් කළ යුත්තේ කණ්ඩායමක් අත්අඩංගුවට ගනිමින්ය.
මව්වරුන්
වැදගත්ම කාරණය මෙයයි. මේ වෛද්‍යවරයා අත්අඩංගුවට ගැනීමෙන් පසුව පොලිස් මාධ්‍ය ප්රකාශක රුවන් ගුණසේකර වෛද්‍ය සාෆි ලවා සිසේරියන් සැත්කමක් කොට, දරු උපත් නැතැයි සැකයක් තිබෙන මව්වරුන්ට ඉදිරිපත් වන ලෙස කියා තිබුණි. ඒ අනුව තමන් වඳභාවයට පත්කර ඇතැයි සැකයක් තිබෙන මව්වරුන් දෙසීයකට වැඩි ප‍්‍රමාණයක් සටහන ලියැවෙන මොහොත වෙද්දී පොලීසියට ඉදිරිපත් වී ඇත. දැන් වෛද්‍ය සාෆි වඳ සැත්කම් කර ඇතැයි පිළිගන්නා අයට තිබෙන අංක එකේ සාධකය එයයි. ඒත් ඇත්තටම මව්වරුන් පෝලිමේ පැමිණ දරුවන් නැති බව කීමම චෝදනාවක් ඔප්පු කිරීමට සාක්ෂියක් කරගත හැකිද?
දිවයින පුවත්පත මුලින් කීවේ සැත්කම් 4000ක් කළ බවට සාක්ෂි ඇති බවයි. එහෙත් තවම එකදු මවක්වත් වඳභාවයට පත්කළ බව ඔප්පු වී නැත. ඒ වෙනුවට තමන්ව වඳභාවයට පත්කර ඇතැයි සැක බව කියන මව්වරුන් පමණක් ඉදිරිපත් වී ඇත. මෙවැනි ප‍්‍රවෘත්තියක් පළවීමෙන් පසුව මේ වෛද්‍යවරයාගෙන් සැත්කම් කරගත් ඕනෑ මවක ඉදිරිපත් වනු ඇති බවට සැකයක් නැත.
ඒ අතර සිසේරියන් සැත්කමෙන් පසුව අත්කකුල්වල වේදනා, හිසේ කැක්කුම් ඇතිවූ අය විශාල ප‍්‍රමාණයක් සිටින බව එම මව්වරුන් මාධ්‍යවලට කළ ප‍්‍රකාශවලට ඇහුම්කන් දීමෙන් දැනගත හැකිය. ඇතැම් මව්වරුන්ගේ සිසේරියන් සැත්කමෙන් වසරක්වත් ගෙවී ගොස් නැත. තවත් මවක් ඉතා පැහැදිළිව කියා තිබුණේ තමන් ලක්ෂ ගණනක් දෙවැනි දරුවෙකු ලබන්නට වියදම් කළ බවයි. ඉහළම විශේෂඥයන්ව හමුවූ බවයි. තමන්ගේ සිරුරෙහි කිසිදු වරදක් නැතැයි ඒ විශේෂඥයන් කී බවයි. ඒ මවගේ කතාවේදී පැහැදිළි වෙන්නේ ඇයගේ පැලෝපීය නාලය අවහිර කර නැති බවය.
තවත් අපූරු කාරණාවක් කිව යුතුය. වෛද්‍ය සාෆිගෙන් සැත්කම් සිදු කරවාගෙන දෙවැනි දරුවන් නොලද මව්වරුන් සැකය නිසා ඉහත කී ලෙස ඉදිරිපත් වෙයි. එහෙත් දෙවැනි දරුවන් ලද මවුවරුන්ට ඉදිරිපත් වෙන ලෙස ඉල්ලීමක් කර නැත. ඔවුන් ඉදිරිපත් වෙන්නේද නැත. අපි එවැනි මව්වරුන්ව සොයන්නට උත්සාහ කළෙමු. අපට කුරුණෑගල ප‍්‍රදේශයේ ප‍්‍රකට ගුරුවරියක් හමුවිය. ඇය මෙසේ කීවාය.
‘මගේ දරුවෝ තුන්දෙනාවම සීසර් කලේ ඩොක්ටර් සාෆි. 2004 දී මගේ පලවෙනි බබා හම්බවෙන්න හිටියේ සාමාන්‍ය විදියට . නමුත් ඇඞ්ම්ට්වෙලා මාව ලේබර් ?ම් ඒකට දාලා පරීක්ෂා කරනකොට එතැනින් කිව්වා. දරුවාට ඇතුලේදී මලපහ වෙලා නිසා සීසර් කරන්න ඕනෑ බව. මාව සීසර් කරන්න අරගෙන ගියා. වෛද්‍ය සාෆි තමයි සීසර් කරන්න හිටියේ. මාව ලේබර් ?ම් ඒකට ගන්න කොටත් වෙන අම්මා කෙනෙක්ගේ සීසර් ඒකක් කරමින් තමයි හිටියේ. නමුත් ඒ් සීසර් ඒක අතරතුර මාවත් සාෆි සීසර් කලා. මගේ බබාව ඒළියට ගන්නකොටම බබාගේ මළපහ පිටදිගේ ගිහින් බෙල්ල දක්වා ඇවිත් තිබුණේ. සාෆි වෛද්‍යවරයා තමයි මගේ දරුවාව බේර ගත්තේ. මගේ පළවෙනි දරුවා ලැබුණේ 2004 , දෙවනි දරුවා 2007 , තුන්වෙනි දරුවා 2011 දි ලැබුනේ . ඒ් හැම උපතක්ම සිද්ද වුනේ සාෆි වෛද්‍යවරයා අතින්. මට නම් ප‍්‍රශ්නයක් වුණේ නැහැ.’
සේවයේ නැවත පිහිටුවීම
මේ වෛද්‍යවරයා මැතිවරණයට ඉදිරිපත් වීමේදී අහිමිවූ තනතුරෙහි නැවත සේවයේ පිහිටුවීමේ කතාවද පැහැදිළි කළ යුතුය. අමාත්‍ය මන්ඩල පත‍්‍රිකා අංක 16 / 0636/ 718 / යටතේ මැතිවරණයට ඉදිරිපත් විම සඳහා රජයේ සේවයෙන් ඉල්ලා අස් වූ වෛද්‍ය නිලධාරීන් නැවත සේවයේ පිහිටු වීම යන මැයෙන් සෞඛ්‍ය , පෝෂණ හා දේශිය වෛද්‍ය රාජිත සේනාරත්න එම වෛද්‍යවරයාව සේවයේ පිහිටුවා තිබුණි. එහෙත් එය අලූත් කාරණයක් නොවේ. එම කැබිනට් පත‍්‍රිකාවේම සඳහන් වන පරිදි 2009 .11.18 සහ 2010 .11.17 දිනැති අමාත්‍ය මණ්ඩල තීරණ වලින් මීට පෙරද එසේ වෛද්‍යවරුන්ව සේවයේ පිහිටුවා ඇත. වෛද්‍යවරුන් පමණක් නොව විදුහල්පතිවරුන්ද එලෙස සේවයේ පිහිටවා තිබේ. මේ කියන කැබිනට් පත‍්‍රිකාවෙන් වෛද්‍යවරුන් තිදෙනෙක්ව සේවයේ පිහිටුවා තිබුණි. වෛද්‍ය සාෆි ඉන් එක් අයෙකු පමණි. මෙය සාමාන්‍ය තත්වයක් වුව ඕනෑම සාමාන්‍ය දෙයක් මෙවැනි අවස්ථාවක අසාමාන්‍ය දෙයක් බවට පත්විය හැකිය.
පරීක්ෂණ කමිටුව
මේ වෙද්දී සෞඛ්‍ය අමාත්‍යාංශයෙන් ශ‍්‍රී ලංකා වෛද්‍ය සභාවේ නියෝජිතයන්ද, මෙම ක්ෂේත‍්‍රය පිළිබඳ විශේෂඥ වෛද්‍යවරුන්ගේ කොලීජියේ නියෝජිතයන්ද සහිත හයදෙනෙකුගේ පරීක්ෂණ කමිටුවක් පත් කර ඇත. වෛද්‍ය සභාව හා කොලීජිය යනු මෙම ක්ෂේත‍්‍රය පිළිබඳව සිටින ඉහළම විද්වතුන්ය. එහෙත් එම කමිටුව පිළිබඳ විශ්වාස නැති බව දැන් ඇතැම් අය චෝදනා කරන්නට පටන්ගෙන තිබේ. පිළිගත් කෙනෙකු ඉදිරියට පැමිණ මෙම කමිටුවේ එක් එක් සාමාජිකයන්ව නම් කොට ඔවුන්ව විශ්වාස කළ නොහැක්කේ මන්දැයි පැවසිය යුතුය. මන්ද යත් එම කමිටුවෙහි ලංකාවේ ප‍්‍රවීණම විශේෂඥයන් සිටින නිසාය.
ඉදිරිපත්ව සිටින මව්වරුන් පරීක්ෂා කිරීමෙන් හා ඉහත කී වෛද්‍යවරයා අතින් සිසේරියන් සැත්කම් සිදු කරවාගත් මව්වරුන් පිළිබඳ සොයා බැලීමෙන් පහසුවෙන්ම ඉහත කී චෝදනා ගැන සොයාගත හැකිය. මැයි 29 දින දිවයින පුවත්පත ප‍්‍රධාන ප‍්‍රවෘත්තියෙන් කියා තිබුණේ පැලෝපීය නාලය අවහිර කර ඇති බව ලංකාවේදී පරීක්ෂණ කර සොයාගත නොහැකි බවය. මෙසේ කියන්නට හේතුව පැහැදිළිය. ඉහත කී පරීක්ෂණ කමිටුවෙන් පරීක්ෂණය අවසන් කරද්දී, එහි වාර්තා පිළිනොගන්නා තැනට ජනතාව පෙළගැස්වීම ඒ පුවතෙහි අරමුණය. කුඩා පිළිකා සෛල මෙන්ම ශරීරයේ පුංචි අභ්‍යන්තර තුවාල පවා සොයන්නට තාක්ෂණය තිබෙන යුගයක පැලෝපීය නාලය අවහිර කර ඇති බව සොයාගත නොහැකි බව කියද්දී, ඒවා පිළිගන්නේ ගෝත‍්‍රිකයන් පමණි.
මේ අතර කුරුණෑගල රෝහලේ අධ්‍යක්ෂකවරයා මාධ්‍ය සාකච්චාවක් පවත්වමින් පවසා තිබුණේ අදාල කමිටුවෙන් සිදු කරන පරික්ෂණ කුරුණැගල රෝහලේ නිලධාරීන්ට පිලිනොගත හැකි බවයි. එම කමිටුවට කුරුණෑගල රෝහලේ සිටිනා නිලධාරීන් කිහිපදෙනෙකුවත් එක් කර ගන්නා ලෙස ඔහු දන්වා තිබුණි. පෙර කී පරිදි කුරුණෑගල රෝහලේ නිලධාරීන් යනු මේ සිදුවීමෙහි චූදිතයන්ය. චෝදනා ඇත්ත නම් මේ සියල්ල සිදුවෙන්නට ඉඩහැර තිබෙන පරිපාලන ප‍්‍රධානියා වන සරත් වීර බණ්ඩාර අධ්‍යක්ෂවරයාද චූදිතයෙකි. ඔහු ඉල්ලන්නේ චූදිතයන්ගේ නියෝජිතයෙකු පරීක්ෂණ කමිටුවට පත් කරන ලෙසය.
චෝදනාව බොරුද?
අප මේ සටහනෙන් කියන්නට උත්සාහ කළේ වෛද්‍යවරයාට තිබෙන චෝදනාව සම්පූර්ණයෙන්ම වැරදි චෝදනාවක් බව නොවේ. ඒ චෝදනාව ඇත්තක් යැයි පිළිගැනීම දැනට ඇති කරුණු මත අපහසු බවය. එමෙන්ම එකිනෙකට සම්බන්ධයක් නැති සිදුවීම් ගණනාවක් එකතු කොට කතාවක් ගොඩනඟා සාමාන්‍ය ජනතාව බියවැද්දීම දිවයින ඇතුලූ මාධ්‍යවලින් සිදුකර ඇති බවය. අප කියන්නේ සාෆි පිළිබඳ පරීක්ෂණයකින් තහවුරු වන තෙක් බුරා පනින්නේ නැතිව ඉවසාගෙන සිටින ලෙසය. x
