No menu items!
26.1 C
Sri Lanka
28 March,2024

තෙල් මිල වැඩි කළ සාකච්ඡාවේ මුලසුනේ හිටියේ ජනාධිපති, අගමැති

Must read

තෙල් මිල වැඩි කිරීමේ තීන්දුවට බලශක්ති අමාත්‍ය උදය ගම්මන්පිළ වගකිවයුතු බව ශ්‍රී ලංකා පොදුජන පෙරමුණ නිවේදනයක් නිකුත් කරමින් චෝදනා කළත්, එම තීන්දුව ගෙන ඇත්තේ ජුනි 09 වැනිදා පැවති විශේෂ ජීවන වියදම් කමිටු රැස්වීමකදී බවත් එම රැස්වීමේ මුලසුන දරා ඇත්තේ ජනාධිපති ගෝඨාභය රාජපක්ෂ හා අග්‍රාමාත්‍ය මහින්ද රාජපක්ෂ බවත් එම රැස්වීමට සහභාගී වූ අමාත්‍යවරයෙකු පැවසීය.

එම ජීවන වියදම් කමිටු රැස්වීමට වෙළඳ අමාත්‍ය බන්දුල ගුණවර්ධන, විදුලිබල අමාත්‍ය ඩලස් අලහපෙරුම, කෘෂිකර්ම අමාත්‍ය මහින්දානන්ද අලුත්ගමගේ, රාජ්‍ය අමාත්‍ය අජිත් නිවාඩ් කබ්රාල්, රාජ්‍ය අමාත්‍ය ලසන්ත අලගියවන්න, ජනාධිපති ලේකම් පීබී ජයසුන්දර, අග්‍රාමාත්‍ය ලේකම් ගාමිණී සෙනරත්, මුදල් අමාත්‍යාංශ ලේකම් එස්ආර් ආටිගල සහභාගී වී තිබුණි.

එම අමාත්‍යවරයා වැඩිදුරටත් ප්‍රකාශ කළේ තෙල් මිල වැඩි කිරීමට ප්‍රධාන හේතුව ලෙස එහිදී සාකච්ඡාවට ලක් වුණේ ඛණිජ තෙල් විෂය සම්බන්ධ ගැටළුවක් නොව, රටේ ආර්ථික අස්ථාවරත්වය, විදේශ සංචිත අර්බුදය සහ මූල්‍ය අස්ථාවරත්වය බවය.

ඉහත කී ආර්ථික ගැටළු හේතුවෙන් තෙල් මිල ඉහළ දැමීම හැර විකල්පයක් නැති බව මුදල් අමාත්‍යාංශ ලේකම් එස්ආර් ආටිගල එහිදී කී බවත්, ඒ අනුව ගත් තීන්දුවට අත්සන් කළේ අග්‍රාමාත්‍ය, මුදල් අමාත්‍ය මහින්ද රාජපක්ෂ බවත් ඔහු කීය.

එම අවස්ථාවේ විෂයභාර අමාත්‍ය ගම්මන්පිළ තෙල් මිල වැඩි කිරීමේ තීන්දුවට එකඟතාව පළකර නොමැති අතර රාජ්‍ය අමාත්‍ය අජිත් නිවාඩ් කබ්රාල්, ජනාධිපති ලේකම් පීබී ජයසුන්දර, මුදල් අමාත්‍යාංශ ලේකම් එස්ආර් ආටිගල පෙන්වා දී ඇත්තේ තෙල් මිල වැඩි කිරීම හැර විකල්පයක් නොමැති බවය.

තෙල් මිල වැඩිකිරීමේ තීන්දුව සම්බන්ධයෙන් විෂයභාර අමාත්‍ය උදය ගම්මන්පිල ඉල්ලා අස්විය යුතු බව සඳහන් කරමින් ශ්‍රී ලංකා පොදුජන පෙරමුණේ ලේකම් සාගර කාරියවසම් නිවේදනයක් නිකුත් කර තිබූ අතර එහි මෙසේ සඳහන්ය. ‘ඛණිජ තෙල් මිල ඉහළ දමා මෙම අසීරු අවස්ථාවේ පීඩාවට පත්ව ඇති ජනතාව තවත් අසීරුතාවයට පත් වන ආකාරයේ තීරණයක් ගැනීම හැර වෙනත් විකල්පයක් නොමැති තත්වයකට රජය පත් කිරිම සම්බන්ධව අප පක්ෂයේ දැඩි අවධානය යොමුව ඇත.’

‘නිසි අවස්ථාවන්හිදී අවශ්‍ය තීන්දු තීරණ ගැනීමට අදාල විෂයභාර අමාත්‍යවරයා කටයුතු නොකිරීම මත රජයට මෙවැනි වූ අසීරු තත්වයකට පත්වීමට සිදුව ඇති බව අපේ දැඩි අවධානයට ලක්ව ඇත.’ යනුවෙන් එම නිවේදනයේ වැඩිදුරටත් සඳහන් වේ.

කෙසේ වෙතත් ජුනි 11 වැනිදා මාධ්‍ය සාකච්ඡාවකදී රාජ්‍ය අමාත්‍ය අජිත් නිවාඩ් කබ්රාල් තෙල් මිල වැඩි කිරීමේ තීන්දුව පිළිබඳ ප්‍රකාශයක් කරමින් මේ වන විට රට පොදුවේ මුහුණදෙන ආර්ථික අර්බුදයත් තෙල් මිල වැඩි කිරීමට බලපා ඇති ආකාරය පැහැදිලි කර තිබුණි.

ඔහුගේ ප්‍රකාශයෙන් කොටසක් මෙසේය. ‘ඛණිජ තෙල් සංස්ථාව දිගින් දිගටම පාඩු ලබනවා. පළවැනි මාස හතරේදී බිලියන 45ක පමණ පාඩුවක් ලබලා තියෙනවා. ඒ පාඩුව බැංකුවලට බලපානවා. බැංකුවල තිබෙන ශේෂපත්‍රය ඒ හරහා දුර්වල වෙන්න පුළුවන්. ඒක මහ බැංකුවටත් බලපානවා. ඒත් එක්කම ඒ හරහා රටේ මූල්‍ය ශ්‍රේණිගත කිරීම්වලට බලපෑමක් ඇතිවෙනවා. මේ හැමදේම සම්බන්ධයි. ඒ නිසා මිල වෙනසක් ඇති කරන්න සිදු වේවි.

එහෙම නොකළොත් අපේ රටට යම් බලපෑමක් ඇති වෙන්න පුළුවන්. මහ බැංකුව ඉතාමත් ඕනෑකමින් රජයට උපදෙස් දීලා තියෙනවා. මහ බැංකුව තමයි රජයේ ආර්ථික උපදේශක. මහ බැංකු අධිපතිතුමා 2021 මැයි 21 වැනිදා පැහැදිලි ලෙස ලිපියක් එවලා තියෙනවා තෙල් මිල සංශෝධනය කළ යුතුයි, එහෙම නොවුණොත් මූල්‍ය ස්ථාවරත්වයට බලපෑමක් ඇති වෙනවා කියලා.’■

 

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි