No menu items!
21.8 C
Sri Lanka
28 March,2024

ජීඑම්ඕඒ මහත්තුරු කළ වැඩෙන් අපි ඉල්ලගෙන පරිප්පු කෑවා – මහාචාර්ය නාරද වර්ණසූරිය ශ්‍රී ලංකා වෛද්‍ය සභාවේ හිටපු සාමාජික

Must read

■ අරුණ ජයවර්ධන

ඔබ ඇතුළු පසුගියදා ශ්‍රී ලංකා වෛද්‍ය සභාවෙන් ඉවත් කරන ලද පිරිසට එල්ල කරන ලොකුම චෝදනාව තමයි, රාජිත සේනාරත්න ඇමතිවරයාගේ කාලයේ වෛද්‍ය සභාවට පත්වුණ මේ පිරිස කණ්ඩායමක් වශයෙන්, විදේශීය වෛද්‍ය විද්‍යාලවලට ඇතුළත් වෙන්න තියෙන අවම සුදුසුකම් අඩු කරන්න කටයුතු කරලා තියෙනවාය යන්න.

පළමුවෙන්ම, අප කණ්ඩායමක් හැටියට මේක ඇතුළෙ වැඩ කළාය කිරන එක මහ පුදුම කතාවක්. මම කවදාවත් කිසිම කණ්ඩායමක ඉඳලා නැහැ. මගේ ස්ථාවරය මම ඒක ඇතුළේ වෙනම ප්‍රකාශ කරලා තියෙනවා.

 

එතකොට මේ අවම සුදුසුකම් අඩු කළාය කියන චෝදනාව?

අවම සුදුසුකම් ගැන කතාව අපට ආවේ විශේෂයෙන්ම කරුණු දෙකක් පදනම් කරගෙන. පළවෙනි එක පුද්ගලික වෛද්‍ය විද්‍යාල මෙහෙ පටන්ගන්න හදන කොට ඒවාට ඇතුළත් කරගැනීමට අවම ප්‍රමිතියක් හදලා තිබුණේ නැහැ. 2011 තමයි මම වෛද්‍ය සභාවට මුලින්ම බැඳුණේ. මහාචාර්ය ලලිතා මෙන්ඩිස් තමයි සභාපතිනිය. ඉස්සර ඉඳලාම පිටරට විශ්වවිද්‍යාල රාශියක් අපි පිළිඅරගෙන තිබුණා. නමුත් විධිමත් ක්‍රමවේදයකට අනුව නෙවෙයි, ලියුමක් ආවාම ඒ ගැන සලකලා පිළිගත්තා වගේ දෙයක් තිබුණේ. ඒවාට ළමයි ගිහින් ලියාපදිංචි වෙලා වෛද්‍ය උපාධියක් අරගෙන ආවාම ලංකාවේ වෛද්‍ය වෘත්තියට සුදුසුකම් ලැබීමේ විභාගයට (ඊආර්පීඑම්) වාඩිවෙලා සමත් වුණොත් වෛද්‍ය වෘත්තියට ඇතුළත් වෙන්න ඉඩ දුන්නා.

2011 වෙනකොට ඔය විභාගෙන් සමත් වෙන ප්‍රතිශතය එන්න එන්නම අඩුවුණා. ලංකාවේ ළමයින්ටත් වඩා තද විභාගයක් තමන්ට දෙනවා කියලා, එහෙම ඉගෙනගෙන ආ ළමයි අපටත් චෝදනා කරන්න පටන් ගත්තා. ඇත්ත වශයෙන්ම එහෙම තද විභාගයක් දුන්නේ නැහැ. සාමාන්‍ය සරල විභාගයක්. නමුත් අසමත් වෙන කට්ටිය වැඩිවුණා. ඒ අවස්ථාවේදී මහාචාර්ය ලලිතා මෙන්ඩිස් කිව්වා, අපි මේකට හේතු මොනවාද කියලා බලමු කියලා. අපි බැලුවා මොන විශ්වවිද්‍යාලවලින් එන කට්ටියද ෆේල් වෙන්නේ, ඒ අයගේ පසුබිම මොකක්ද කියලා. සමහර පිටරට වෛද්‍ය විද්‍යාලවලින් ෆේල් වෙන ප්‍රමාණය වැඩියි. තවත් පෙනීගියා, මේ ළමයි අපොස උසස්පෙළ හරි සුදුසුකමක් නැතිව තමයි මේවාට යන්නේ කියලා. ඒ වෙලාවෙ තමයි වෛද්‍ය සභාාව තීරණය කළේ මේ වෛද්‍ය විද්‍යාව ඉගැන්වීම් සඳහා අවම ප්‍රමිතීන් හදන්න ඕනෑය කියලා. ඒ අවස්ථාවේදී විශ්වවිද්‍යාල ප්‍රතිපාදන කොමිෂන් සභාවෙන් අපි ඇහුවා, ලංකාවේ වෛද්‍ය විද්‍යාලවලට දිස්ත්‍රික් පදනමද ඇතුළුව, ඇතුළුවන ළමයකුගේ අඩුම ප්‍රතිඵලය මොකක්ද කියලා.  අපට ලැබුණ පිළිතුර ‘සී දෙකයි, එස් එකයි’. අපි ඒ සී දෙකයි එස් එකයි අවම සුදුසුකම වශයෙන් දාලා අවම රෙගුලාසි හැදුවා. ‘සී දෙකයි එස් එකයි හෝ ඊට සමාන වෙනත් විභාගයක්’ කියලා පිටරට යන අයටත් අදාළ වන ලෙස දැම්මා. මේකට ඉංග්‍රීසියෙන් කියන්නේ ‘මිනිමම් ස්ටෑන්ඩඞ් ෆො මෙඩිකල් එඩියුකේෂන්’ කියලා.

අපි හැදුවාට ප්‍රමාණවත් නැහැ. ඒක නීතිමය පදනමකට එන්නේ පාර්ලිමේන්තුවෙන් අනුමත කළොත් විතරයි. අපි ඒක පාර්ලිමේන්තුවට 2012දීත්, ඊට පස්සේත් වරින්වර දැම්මා. ඒත් එකම වෙලාවකදීවත් පාර්ලිමේන්තුව මේක අනුමත කරලා ගැසට් කළේ නැහැ. අද දක්වාම සීයට සීයක් ඒක අනුමත කරලා ගැසට් කරලා නැහැ. මෑතකදී පවිත්‍රා වන්නිආරච්චි මහත්මිය ඒක අනුමත කරගත්තා. නමුත් තාමත් ඒකෙ අවසාන ගැසට් එක ගහලා නැහැ.

 

එතකොට ඒ ප්‍රමිතිය ක්‍රියාත්මක වුණේම නැද්ද?

2011 ඉඳලාම අපි අඩු උසස් පෙළ ප්‍රතිඵලවලින් පිටරට වෛද්‍ය විද්‍යාලවලට යන්න කාටවත් ඉඩ දුන්නේ නැහැ. ආවාම අර විභාගය ලියන්න ඉඩ දුන්නේත් නැහැ. නීතිය පාර්ලිමේන්තුවෙන් හැදුවේ නැති වුණාට, අපි ඒක අපේ නීතියක් වශයෙන් 2012 ඉඳලා පාවිච්චි කළා. ‘ඩි ජුරේ’ හෙවත් නීතිය අපට ලැබිලා තිබුණේ නැති වුණත් ‘ඩි ෆැක්ටෝ’ විදියට, ඒ කියන්නේ ප්‍රායෝගිකව අපි ඒ ප්‍රමිතිය ක්‍රියාත්මක කළා.  මමවත් අපි කිසි කෙනෙක්වත් ඒ අවම ප්‍රමිතිය නැතිව ගන්න කියලා නැහැ.

නමුත් 2011ට කලින් විවිධ වෛද්‍ය විද්‍යාලවලට ළමයි ලොකු සංඛ්‍යාවක් ගිහින් තිබුණා. ඒ අය යනකොට උසස්පෙළ කිසිම අවම ප්‍රමිතියක් තිබුණේ නැහැ. ඒ නිසා විවිධ අන්දමින් ඒ ඒ වෛද්‍ය විද්‍යාලවලට ඇතුළු වෙලා තිබුණා. ඒ අය ආපහු ආවාම, ඔවුන් ඉගෙන ගත්තේ පිළිගත්ත වෛද්‍ය විද්‍යාලයකින් නිසා ඒ අයට ඊආර්පීඑම් විභාගය ලියන්න ඉඩදීලා තියෙනවා කවුරුවත් ප්‍රශ්න කරන්නේ නැතිව. එතකොට අපි සභාවේ හිටියේ නැහැ. ඊආර්පීඑම් එක එක පාරෙන් පාස්වෙන්නේ නැහැ. දෙතුන් පාරක් ලියලා තමයි සාමාන්‍යයෙන් පාස්වෙන්නේ.

පාදෙනිය මහත්තයලා කට්ටිය වෛද්‍ය සභාවට ආවාට පස්සේ, 2011ට ඉස්සෙල්ලා පිටරට ගිය එකසිය ගානක කට්ටියක් ඊආර්පීඑම් ලියලා පාස්වෙලා ලියාපදිංචිය ගන්න යනකොට, වෛද්‍ය සභාවේ ලේඛකාධිකාරි මහත්මයා ඔවුන්ගේ උසස් පෙළ ප්‍රතිඵල ඇහුවා. ඒක අදාළ නැහැ. නමුත් මෙයා අහලා තියෙනවා. හොයලා බැලුවාම හතලිස් ගණනක කණ්ඩායමකට උසස් පෙළ අවම ප්‍රමිතිය නැහැ. දහදෙනෙක් විතර උසස් පෙළ ප්‍රතිඵල ඇත්තෙම නැති අයත් හිටියා. මේ ගැන සාකච්ඡාව සභාවට ආවාම, අපි සමහර අය කිව්වේ, මේ අය යනකොට අවම ප්‍රමිතිය පිළිබඳ නීතියක් තිබුණේ නැහැ. ගිහිල්ලා තියෙන්නේ පිළිගත් වෛද්‍ය විද්‍යාලයකට. ඇවිත් අපේ විශේෂ විභාගය ලියන්නත් අවසර ඉල්ලලා තියෙනවා. අපි අවසර දීලාත් තියෙනවා. මේ අය සල්ලි බැඳලා ඒ විභාගය තුන් හතර වතාවක් කරලා පාස්වෙලාත් තියෙනවා. මේ ඔක්කොම කරලා මේ අය ලියාපදිංචියට එනකොට, ඔබට උසස්පෙළ නැහැ කියලා ලියාපදිංචිය නොදෙන එක සාධාරණ යුක්ති ධර්මය අනුව කරන්න පුළුවන් දෙයක් නෙවෙයි කියලා.

ඔන්න ඔය ස්ථාවරය ගත්ත එකට තමයි, මාව හංවඩු ගහන්නේ උසස්පෙළ නැතිව වෛද්‍යවරු වෙන්න අනුබල දුන්නාය කියලා. 2011න් පස්සේ ගිය කිසිම කෙනකුට උසස්පෙළ නැතිව දෙන්න කියලා මම කියලා නැහැ. මේ නීතිය දමන්න කලින් ගිහිල්ලා උපාධියක් අරගෙන ඇවිත් මෙහෙ විභාගෙත් පාස්වෙච්ච අයට ලියාපදිංචිය දෙන්න අපි නීතියෙන් බැඳිලා ඉන්නවා කියලායි මම කිව්වේ. නමුත් මම කිව්වාට ගණන් ගත්තේ නැහැ. වැඩි ඡන්දෙන් ලියාපදිංචිය නොදෙන්න තීරණය කළා.

ඒ තීරණයට විරුද්ධව මේ ළමයි කණ්ඩායම ශ්‍රේෂ්ඨාධිකරණයට ගියා. ශ්‍රේෂ්ඨාධිකරණය අපව ඉතාමත් හාස්‍යයට ලක්කරන තීන්දුවක් දුන්නා. ඔබලාට කිසිම අයිතියක් නැති බලයක් අරගෙන අසාධාරණයක් කරලාය කියලා අපට නියෝග කළා, මේ අයට ලියාපදිංචිය දෙන්න කියලා. අපි ඒ නියෝගය ක්‍රියාත්මක කරලා තියෙනවා. ශ්‍රේෂ්ඨාධිකරණය කිව්වා ඕගොල්ලො මේ උසස්පෙළ රෙගුලාසියක් දාලා තිබුණාට ඒකට තවමත් නීතිමය බලයක් ලැබිලා නැහැ කියලා. අපි මෙච්චර කාලයක් ඒ ප්‍රමිතිය පාවිච්චි කරමින් හිටියා. කවුරුත් අපට අභියෝග කළේත් නැහැ. නීතිමය පදනමක් අපට නැහැ කියලා කවුරුත් කියන්න ආවෙත් නැහැ. ශ්‍රේෂ්ඨාධිකරණය තවදුරටත් කිව්වා, දැනට උසස්පෙළ අවම ප්‍රමිතියක් ගැන කතාකරන්නවත් ඕගොල්ලන්ට අයිතියක් නැහැ, එහෙම නීතිමය පදනමක් නැහැ කියලා. ජීඑම්ඕඒ එකේ මහත්තුරු කළ වැඩෙන් අපි ඉල්ලගෙන පරිප්පු කෑමක් වුණේ.

අන්තිමට, 2011න් පස්සෙ අවම සුදුසුකම් නැතිව ආ කට්ටියත් දැන් අපෙන් ඉල්ලනවා ලියාපදිංචි කරන්න කියලා. අපි පුදුම අසීරු තත්වයකට වැටිලා තියෙන්නේ.

අපි කියලා තියෙනවා, උසාවියකින් අපට නියෝගයක් දුන්නොත් ඒ නියෝගය කඩන්න නම් බැහැ කියලා.

 

අවම ප්‍රමිතිය තවමත් එහෙමම පවතිනවාද?

අවම ප්‍රමිතිය හැදුවේ ඒ අවස්ථාවේ අවම ප්‍රතිඵලය මොකක්ද කියලා ප්‍රතිපාදන කොමිසමෙන් අහලානේ. මෑතකදි සයිටම් ප්‍රශ්නය නිසා අපට අවම ප්‍රමිතිය අලුතෙන් හදන්න කිව්වා. ඒ අනුව 2018දී අපි අලුතෙන් හැදුවා. අලුතෙන් හදන වෙලාවේ ප්‍රතිපාදන කොමිසමෙන් අවම ප්‍රතිඵල ඇහුවාම කිව්වා ‘බී තුනයි’ කියලා. ඒ නිසා අලුත් ප්‍රමිතියේ අපි දැම්මේ බී තුනක් කරන්න කියලා. නමුත් ඒක නීති කෙටුම්පත් සම්පාදක වෙතට ගියාම එතැනින් සී දෙකයි එස් එකයි කළා. ළඟදී අනුමත කළ එකේ තියෙන්නෙත් සී දෙකයි එස් එකයි. ඔය ගැන මම පැහැදිලිවම වෛද්‍ය සභාව ඇතුළේ කතාකරලා තියෙනවා. මම කියලා තියෙනවා මේක බී තුනක්වත් කරන්න ඕනෑය කියලා.

මම කිසි තැනක 2011න් පස්සේ උසස්පෙළ නැති ළමයකු ලියාපදිංචි කරන්න කියලා අතඋස්සලා නැහැ. නමුත් උසාවි නියෝගයක් ආවොත් අත උස්සන්න දෙයක් නැහැ, ක්‍රියාත්මක කරන්න වෙනවා. ■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි