No menu items!
26.1 C
Sri Lanka
28 March,2024

ජනාධිපති ඇඳිරි නීතිය පනවන්න දන්නේ නැද්ද?

Must read

-ඇඳිරි නීතිය පිළිපදින්න, එහෙත් නීතියට අනුව ඇඳිරි නීතිය පනවා නැහැ

පාර්ලිමේන්තු මන්ත්‍රි රන්ජන් රාමනායක පසුගිය සතියේ අත්අඩංගුවට ගත් අතර ඒ මොහොතේ මාධ්‍යවලින් වාර්තා කර තිබුණේ ඇඳිරි නීතිය කඩකිරීම හා පොලීසියේ රාජකාරිවලට බාධා කිරීම යන චෝදනා මත ඔහු අත්අඩංගුවට ගත් බවය. එහෙත් මේ වන විට රන්ජන් රාමනායකට ඇප ලැබී තිබේ. ඇප ලබාගත් අවස්ථාවේ රන්ජන් රාමනායක වෙනුවෙන් පෙනීසිටි ජනාධිපති නීතිඥ එම්.ඒ. සුමන්තිරන් පෙන්වාදී තිබුණේ ඇඳිරි නීතිය නීත්‍යානුකූල නොවන නිසා, රන්ජන් රාමනායක වරදක් කර නැති බවය. මේ කතාවට සමාජ මාධ්‍යවලින් ප්‍රචාරයක් ලැබී තිබේ.

ඇඳිරි නීතිය කඩකළ 34,956 දෙනෙකු අත්අඩංගුවට ගත් බව අප්‍රේල් 22 වැනිදා වනවිට පොලිස් මාධ්‍ය ප්‍රකාශක ජාලිය සේනාරත්න ප්‍රකාශ කර ඇත. වාහන 8,948ක්ද අත්අඩංගුවට ගෙන ඇත. මෙලෙස අත්අඩංගුවට ගත් බොහෝ දෙනෙකුට වහා ඇප ලැබීම සිදුවෙයි.

ඇඳිරි නීතිය නීත්‍යානුකූල නොවන බව මෙවැනි පසුබිමක සංවාදයක් මතුවෙන අතර, රජය පැනවූ ඇඳිරි නීතිය පිළිනොගෙන කොවිඞ්-19 වසංගතය පැතිරෙන ආකාරයෙන් මහජනතාව හැසිරීමේ ඉඩකඩක් මෙවැනි පසුබිමක නිර්මාණය වෙයි. ඒ නිසා නීතීයට අනුව ඇඳිරි නීතිය පැනවීමේ අවශ්‍යතාව ඇත.

එහෙත් ඇඳිරි නීතිය කඩකළේයැයි මීට පෙර අත්අඩංගුවට ගත් හිටපු පාර්ලිමේන්තු මන්ත්‍රි රන්ජන් රාමනායකට ඇප ලබාදී තිබෙන්නේ ඇඳිරි නීතිය කඩකිරීම නීතිමය වරදක් නොවන බව අධිකරණය ඉදිරියේ පෙන්වාදීමෙන් පසුවය. ඒ පිළිබඳව අප කළ විමසීමකදී ජනාධිපති නීතිඥ එම්.ඒ. සුමන්තිරන් පැවසුවේ වසංගතය පැතිරීමට ඉඩ නොදී මේ මොහොතේ රැඳී සිටිය යුතු වුණත් මේ මොහොතේ පනවා ඇති ‘ඇඳිරි නීතිය’ කඩකිරීම නීතිමය වරදක් නොවන බවය.

ඔහු පෙන්වාදෙන්නේ නීත්‍යානුකූලව ඇඳිරි නීතිය පැනවීමට නීතිමය ප්‍රතිපාදන ජනාධිපතිවරයාට තිබෙන නමුත්, ජනාධිපතිවරයා එසේ නොකිරීම දැන් පවතින ගැටලූව බවයි. ඇඳිරි නීතිය කඩකළායැයි දහස් ගණනක් අත්අඩංගුවට ගෙන ඇතත්, ඔවුන්ට අධිකරණයට ඉදිරිපත් කිරීමෙන් පසු ඇප ලබාදීම සිදුකරන බව ඔහු පැවසීය.

මෙවැනි පසුබිමක ඇඳිරි නීතිය පනවන්නේ කෙසේදැයි ජනාධිපතිවරයා හරිහැටි නොදන්නේදැයි ගැටලූවක් ඇතිවෙයි.

රන්ජන් රාමනායකට ඇප ලබාගැනීම පිළිබඳව ජනාධිපති නීතිඥ එම්.ඒ. සුමන්තිරන් මෙසේ පැවසීය.

‘රන්ජන් රාමනායක මහතාට අද ඇප දුන්නා. රන්ජන් රාමනායක මන්ත්‍රිවරයාව අත්අඩංගුවට ගැනීමට හේතු ඉදිරිපත් කිරීමේදී පොලීසිය කතාව පටන්ගත්තේ ඇඳිරි නීතිය කඩකළා කියලයි. රන්ජන් රාමනායක මන්ත්‍රිවරයා කරපු නීතිමය වරද විදියට සඳහන් කරලා තිබුණේ පොලීසියේ රාජකාරීවලට බාධා කිරීම කියන එක.

එහෙත් මොකක්ද බාධා කිරීම කියලා අහනකොට දුන්නේ ඇඳිරි නීති බලපත්‍රයක් නැති වාහනයක් සම්බන්ධයෙන් මැදිහත් වුණා කියලා. ඒත් නීත්‍යානුකූලව ඇඳිරි නීතියක් නැතිනම්, ඇඳිරි නීති බලපත්‍රයක් ගැන කතාකරන්නේ කොහොමද කියලා අපි ප්‍රශ්න කළා. නීත්‍යානුකූලව ඇඳිරි නීතිය නැති වෙලාවක ඇඳිරි නීති බලපත්‍රයක් ගැන විමසලා, රාජකාරියට බාධා කළ බව තර්ක කරන්න බැහැ.

නීතිමය ඇඳිරි නීතියක් මේ රටේ නෑ. අපි හැම කෙනාම ඒක පිළිපදිනවා. අපි ඒක පිළිපදින්නේ රටේ තියෙන වසංගත තත්වය නිසා. මා පැහැදිලිව කියනවා අපි මේ මොහොතේ වසංගතය පැතිරෙන්නේ නැති ආකාරයට කටයුතු කරන්න  ඕනෑ.

ලොකුම ප්‍රශ්නය තමයි ජනාධිපතිවරයාට ඇඳිරි නීතිය පැනවීමේ හැකියාවක් තිබීම. එහෙත් ඔහු එය නොකර සිටීම. ඔහු ඇඳිරි නීතිය පනවා නැත්තේ කුමන හේතුවක් නිසාද කියා මා දන්නේ නැහැ.

මහජන ආරක්ෂක පනත යටතේ හදිසි තත්වයක් ප්‍රකාශ කොට ඇඳිරි නීතිය පැනවීමේ හැකියාව ජනාධිපතිවරයාට තියෙනවා. ඊට අමතරව හදිසි තත්වයක් ප්‍රකාශයට පත් නොකර වුණත්, ඇඳිරි නීතිය පනවන්න ජනාධිපතිවරයාට පුළුවන්. එය ගැසට් මගින් ප්‍රකාශයට පත් කරන්න  ඕනෑ. එහෙත් එහෙම නොකර මාධ්‍යවලින් ඇඳිරි නීතිය යැයි කියමින් ඉන්නවා. ඒක වැරදියි. එහෙත් මා නැවත සිහිපත් කරනවා, දැන් තියෙන වසංගත තත්වය නිසා හැමෝම නිවෙස්වල රැඳී ඉන්න  ඕනෑ බව.

කෙසේවෙතත් රජය කරමින් ඉන්නේ ලොකු වරදක්. පුද්ගලයන් වගකීම් විරහිත ලෙස ඇඳිරි නීතිය කඩකිරීමේ අවදානමක් මේ නිසා මතු වෙනවා.’

නීතිමය ප්‍රතිපාදන නැති පසුබිමක නම් දැන් කරගෙන යන ක්‍රියාවලිය තේරුම් ගත හැකිය. එහෙත් ඇඳිරි නීතිය ගැසට් කරන්නට පුළුවන්කම තිබියදී ජනාධිපතිවරයා එසේ නොකරන්නේ නොදන්නාකම නිසාද යන්න දැන් ඇති ගැටලූවය.

ඡායාරූපය: Getty Images

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි