No menu items!
21.8 C
Sri Lanka
28 March,2024

ජනාධිපති අමාත්‍යාංශ විෂයන් වෙනස් කළේ
ඡන්ද කල් දාන්නයි

Must read

පළාත් පාලන ඡන්ද බලතල තිබූ රොෂාන් රණසිංහ රට ගොස් අසනීප වෙලා.

මැතිවරණ කොමිසම ඡන්දයට ලෑස්ති වෙලා.

විමල්ගෙන් පොස්පේට් අයින් කරලා.

ජනාධිපතිවරයා විසින් ඔහු බලයට පත්වී අවුරුදු දෙකක් හා මාසයක් ගතවන වනවිට අමාත්‍ය මණ්ඩලයට අදාළ විෂයන් වෙනස් කිරීම ජයග්‍රාහි 22වන වරටත් වරටත් සිදුකර තිබේ. ඒ 2022 ජනවාරි මස 09 දින සහිතව අති විශේෂ ගැසට් පත්‍රයක් නිකුත් කරමින්ය.


මෙම ගැසට් පත්‍රයට අනුව අගමැති මහින්ද රාජපක්ෂ යටතේ පවතින ආර්ථික ප්‍රතිපත්ති හා සැලසුම් ක්‍රියාත්මක කිරීමේ සහ බුද්ධ ශාසන, ආගමික හා සංස්කෘතික කටයුතු, ලොහාන් රත්වත්තේ යටතේ පැවති බන්ධනාගාර කළමනාකරණ හා සිරකරුවන් පුනරුත්ථාපන කටයුතු, අලි සබ්රි යටතේ පවතින අධිකරණ, රොෂාන් රණසිංහ යටතේ පවතින පළාත් සභා හා පළාත් පාලන කටයුතු, ජනක බණ්ඩාර තෙන්නකෝන් යටතේ පවතින රාජ්‍ය සේවා, පළාත් සභා හා පළාත් පාලන, සුසිල් ප්‍රේමජයන්ත යටතේ පැවති අධ්‍යාපන ප්‍රතිසංස්කරණ, විවෘත විශ්වවිද්‍යාල හා දුරස්ථ අධ්‍යාපන ප්‍රවර්ධන, දිනේෂ් ගුණවර්ධන යටතේ පවතින අධ්‍යාපන, ඩීවී චානක යටතේ පවතින ගුවන් සේවා හා අපනයන කලාප සංවර්ධන, විමල් වීරවංශ යටතේ පවතින කර්මාන්ත යන කැබිනට් හා රාජ්‍ය අමාත්‍යාංශවල විෂයන් වෙනස් කිරීම හා අහෝසි කිරීම සිදුකර ඇත.


මෙහිදී බීමත්ව රාත්‍රියේ බන්ධනාගාරවලට යෑම සම්බන්ධයෙන් චෝදනා එල්ලවීම නිසා බන්ධනාගාර කළමනාකරණ හා සිරකරුවන් පුනරුත්ථාපන කටයුතු රාජ්‍ය අමාත්‍ය ධුරයෙන් ඉවත් වූ ලොහාන් රත්වත්තේ යටතේ පැවති සියලු ආයතන අධිකරණ අමාත්‍ය අලි සබ්රි යටතට පත්කර ඇති අතර කාබනික වගා සංග්‍රාමය ඇතුළු ආණ්ඩුවේ කටයුතු විවේචනය කිරීම හේතුවෙන් ධුරයෙන් ඉවත් කරන ලද සුසිල් ප්‍රේමජයන්ත රාජ්‍ය ඇමතිවරයා යටතේ පැවති සියලු ආයතන අධ්‍යාපන ඇමති දිනේෂ් ගුණවර්ධන යටතට පත්කර තිබේ.


රාජ්‍ය අමාත්‍ය ඩීවී චානක යටතේ තිබූ ආයතන ඉවත් කිරීමක් හෝ එයට ආයතන එක් කිරීමක් මෙහිදී සිදුවී නැතත් කර ඇත්තේ එම රාජ්‍ය අමාත්‍යාංශයේ සුවිශේෂ ප්‍රමුඛතා යටතේ ශ්‍රී ලංකා ආයෝජන මණ්ඩලයේ කටයුතු අධීක්ෂණය කිරීම පවරා තිබීමය.
අගමැති මහින්ද රාජපක්ෂ යටතේ පවතින බුද්ධ ශාසන, ආගමික හා සංස්කෘතික කටයුතු අමාත්‍යාංශයට මෙවර අලුතින් ආයතන දෙකක් එක්කර ඇති අතර ඒ මධ්‍යම සංස්කෘතික අරමුදල හා බුද්ධ ශාසන අරමුදලය. මේ ආයතන දෙකම මීට පෙර පැවතියේ ඔහු යටතේම පවතින ආර්ථික ප්‍රතිපත්ති හා සැලසුම් ක්‍රියාත්මක කිරීමේ අමාත්‍යාංශය යටතේ වූ බැවින් එහි විශේෂත්වයක් නැත.


මෙම ගැසට් පත්‍රයේ ඇති විශේෂත්වයන්ගෙන් එකක් වන්නේ පළාත් සභා හා පළාත් පාලන කටයුතු රාජ්‍ය ඇමති රොෂාන් රණසිංහ යටතේ පැවති විෂයන් දෙකක් වූ පළාත් පාලන ආයතන ඡන්ද විමසීම් පනත හා පළාත් සභා ඡන්ද විමසීම පනත ඔහුගෙන් ඉවත්කර රාජ්‍ය සේවා, පළාත් සභා හා පළාත් පාලන ඇමති ජනක බණ්ඩාර තෙන්නකෝන් යටතට පත්කිරීමය.


එම විෂයන් වෙනස් කිරීමේ ජනාධිපතිවරයාගේ අවශ්‍යතාව ඊට සමගාමීව ජනවාරි 10 දින සහිතව ජනක බණ්ඩාර තෙන්නකෝන් ඇමතිවරයා නිකුත් කළ පළාත් පාලන ආයතනවල ඡන්ද විමසීම් අවුරුද්දක කාලයකින් කල් දැමීමේ අති විශේෂ ගැසට් පත්‍රයෙන් මේ වනවිට ඔප්පු වී හමාරය. පසුගිය පළාත් පාලන ඡන්ද විමසීමේදී නියමිත දිනට ඡන්දය පැවැත්වීමට නොහැකි වූ ඇල්පිටිය ප්‍රාදේශීය සභාවේ හැර අනිකුත් පළාත් පාලන ආයතන 340 ඡන්ද විමසීම එළැඹෙන මාර්තු 22 දිනට පෙර පවත්වා අවසන් කළ යුතු අතර ඒවාහි නිල කාලය මාර්තු 20 දින අවසන් වීමට නියමිතය. එමෙන්ම එම මාර්තු 22 දිනය පළාත් පාලන ආයතනවල ඊළඟ කාලය ආරම්භ වන දිනය වශයෙන් පසුගිය පළාත් පාලන ඡන්දය අවසන් වීමෙන් පසු පළාත් පාලන විෂයභාර ඇමතිවරයා ප්‍රකාශයට පත්කර ඇත.

(මෙය එකී පනත් අනුව ඔහු විසින් කළ යුතු කාර්යයකි)


ඒ අනුව පළාත් පාලන ආයතනවල නිල කාලය නැවත ආරම්භ කිරීමට මාස 6කට පෙර ඡන්ද විමසීම් පැවැත්වීමේ හැකියාව මැතිවරණ කොමිසමට ලැබෙන අතර එම කටයුතු සඳහා ඔවුන්ට මාස කිහිපයක් අවශ්‍ය වේ. මැතිවරණ කොමිසම ඒ අනුව නියෝජ්‍ය හා සහකාර මැතිවරණ කොමසාරිස්වරුන්ට පළාත් පාලන ආයතන ඡන්ද විමසීම් සඳහා සූදානම් වන ලෙස නිල වශයෙන් දැනුම් දීමක් පසුගිය දිනවල සිදුකර ඇති අතර මෙම පළාත් පාලන ආයතන ඡන්ද විමසීම්වලට යොදා ගැනීමට නියමිතව තිබූ 2021 වර්ෂයේ ඡන්ද හිමි නාමලේඛනය ජනවාරි 07 වැනිදා සහතික කර තිබේ.


ඒ අනුව කොයි මොහොතේ හෝ මැතිවරණ කොමිසම පළාත් පාලන ආයතනවලට නාම යෝජනා කැඳවමින් ගැසට් පත්‍රයක් නිකුත් කිරීමේ අවදානමක් පැන නැඟී ඇත.


එය අත්හිටුවීම සඳහා ආණ්ඩුවට කළ හැකි එකම ප්‍රතිකර්මය බවට තිබී ඇත්තේ පළාත් පාලන ඡන්ද විමසීම් පනතෙන් එම විෂය භාර ඇමතිවරයාට පැවරී ඇති බලතල අනුව එම ඡන්ද විමසීම් අවුරුද්දක කාලයකට කල් දැමීමය. එසේ ඡන්ද කල් දැමීමේ උපරිමය අවුරුද්දක් වන අතර එය මාස කිහිපය වශයෙන් අවස්ථා කිහිපයකදී මෙන්ම එකවරද කළ හැකිය. ආණ්ඩුව එය එකවරම කරමින් එම ඡන්ද විමසීම් අවුරුද්දකින් කල් දමා ඇත. ඒ අනුව මේ ළඟකදී පළාත් පාලන ඡන්ද පැවැත්වීමේ වුවමනාවක් ආණ්ඩුවට නැති බව පෙන්නුම් කර ඇත.


පසුගිය වසරේ අවසාන කාලයේදී අප අත්දුටු සත්‍යය වූයේ ආණ්ඩුවේ බලය හිමි පළාත් පාලන ආයතනවල බලය එයට අහිමි වෙමින් පවතින බවයි. 2022 වර්ෂයට අයත් අයවැය යෝජනා පරාජය කරමින් ආණ්ඩුව වෙනුවෙන්ම තේරී පත්වු සභිකයින් ආණ්ඩුවට එම අනතුරු ඇඟවීම සිදුකළ අතර ඡන්ද විමසීමකදී ජන්ද හිමි ජනතාවත් එයට එකතු වුවහොත් සිදුවිය හැකි දෙය මේ මොහොතේ කල්පනා කරමින් මෙම ඡන්ද කල් දැමීමේ තීරණයට ආණ්ඩුව එළැඹ ඇති බව පැහැදිලිය.


විෂයභාර ඇමතිවරයාට අවුරුද්දක කාලයකින් ඡන්ද කල් දැමීමට හැකි නම් රොෂාන් රණසිංහ රාජ්‍ය ඇමතිවරයා යටතේ තිබූ එම විෂයන් ජනක බණ්ඩාර තෙන්නකෝන් ඇමතිවරයා යටතට දඩිබිඩියේ මාරුකර ඡන්ද කල් දැමීමේ ගැසට් නිවේදනය නිකුත් කළේ ඇයි? ඊට හේතුව රොෂාන් රණසිංහ රාජ්‍ය ඇමතිවරයා මේ දිනවල විදේශගතව සිටීමය. එපමණක් නොව විදේශගතවී සිටියදී ඔහු අසනීප තත්වයට පත්වීමය. ඒ නිසා ඔහුගේ පැමිණීම සති කිහිපයකින් කල් යෑම හෙවත් ඔහු රටට එන තෙක් සිටීම ආණ්ඩුවට අනතුරක් නිසා විෂයන් මාරුකර එය දඩිබිඩියේ කර ඇත. මන්ද මැතිවරණ කොමිසම නාම යෝජනා කැඳවා ගැසට් පත්‍රයක් නිකුත් කළහොත් එය ආපසු හැරවිය නොහැකි බැවිනි.


මෙම ඡන්ද කල් දැමීමට අදාළ ජනක බණ්ඩාර තෙන්නකෝන් ඇමතිවරයාගේ අති විශේෂ ගැසට් පත්‍රයට අදාළව රජයේ මුද්‍රණ දෙපාර්තමේන්තුවේ වෙබ් අඩවියේ සඳහන් වන්නේ එම ගැසට් පත්‍රය පළාත් සභා හා පළාත් පාලන රාජ්‍ය ඇමතිවරයාගේ ගැසට් පත්‍රයක් බවය. ඉන්ද පැහැදිලි වන්නේ ජනාධිපතිවරයාගේ අමාත්‍යාංශ විෂයන් වෙනස් කිරීමේ මෙම අති විශේෂ නිකුත් කිරීමේ ප්‍රබලම හේතුව ඡන්ද කල් දැමීමට බවය.


එහි අනෙක් විශේෂත්වය වන්නේ කර්මාන්ත ඇමති විමල් වීරවංශ යටතේ තිබූ සීමාසහිත ලංකා පොස්පේට් සමාගම ඔහුගෙන් ඉවත් කිරීමය. ඉවත් කරන ලද මෙම ආයතනය වෙනත් කිසිවකුට ලබාදී නැති අතර ඒ අනුව එය ජනාධිපතිවරයා යටතට පත්වේ. ආණ්ඩුව විවේචනය කරන ආණ්ඩුවේ සෙසු පක්ෂ නායකයෙකු වන විමල් වීරවංශට ජනාධිපතිවරයා ගැසූ කනේ පාරක් ලෙස මෙම ආයතනය ඉවත් කිරීම හැඳින්විය හැකිය. මන්ද විමල් වීරවංශ ඇමතිවරයා එප්පාවල පොස්පේට් අගය එකතුකර රට යැවීමෙන් ශ්‍රී ලංකාවේ ආර්ථික ප්‍රශ්නයට විශාල විසඳුමක් ලැබෙන බව පසුගිය කාලයේ කියමින් සිටීමය. (තවම මතුකරගෙන නැති ශ්‍රී ලංකාවේ ගෑස් නිධිවලින් රටේ සියලු ආර්ථික ප්‍රශ්න විසඳිය හැකි බවට ඔහු සමඟ ආණ්ඩුව විවේචනය කරමින් කටයුතු කරන උදය ගම්මන්පිල ඇමතිවරයා කරන ලද පුරසාරම වාගේය.)


ඒ අනුව අමාත්‍යාංශ විෂයන් වෙනස් කිරීමේ මෙම ගැසට් පත්‍රයෙන් ජනාධිපතිවරයා ඉටුකරගෙන ඇත්තේ කරුණු දෙකක්ය. එකක් මේ අවස්ථාවේ ඡන්දයකට යෑම යනු සියදිවි නසා ගැනීමක් වන බැවින් පළාත් පාලන ආයතන ඡන්ද පවිමසීම හෙවත් මහා නගර සභා, නගර සභා හා ප්‍රාදේශීය සභාවල ඡන්ද විමසීම් කල් දැමීමය. බොහෝ විට එය පසුගිය අයවැය යෝජනා මගින් හා මුදල් ඇමති බැසිල් රාජපක්ෂ රාජ්‍ය සේවයේ වැටුප්, රජයේ විශ්‍රාමික දීමනා, සමෘද්ධි සහනාධාරය ඇතුළු සහන ලබාදෙමින් පසුගිය දිනකදී කළ යෝජනා ක්‍රියාත්මක වනතෙක් කල් මැරීමක් විය හැකිය. (දැන් රටේ පවතන තත්වය අනුව ආණ්ඩුවේ ඡන්ද පදනමේ හෝදාපාළුව යම් පමණකින් අවම කර ගැනීම හැර එම සෝදාපාළුව වැළැක්වීමට ඡන්ද කල් දැමීම මගින් හැකි වන්නේ නැත.)


ඉන්දියාවේ වුවමනාව අනුව වසර කිහිපයක් කල් ගොස් ඇති පළාත් සභා ඡන්දයද පැවැත්වීමට ආණ්ඩුවට සිදුවන අතර ඒ සඳහා ඇති නීතිමය බාධාවන් මඟහැරගෙන එම ඡන්දය පැවැත්වීමටත් පෙරම ගමට හෙවත් පොදු මහජනයාට වඩාත් සමීප පළාත් පාලන ඡන්දයෙන් ආණ්ඩුවේ ඡන්ද පදනම සෝදාපාළුවකට ලක්වීම ප්‍රදර්ශනය කිරීම යනු ඉදිරි පළාත් සභා ඡන්දයට බොහෝ අවාසියක් බව ආණ්ඩුව තේරුම් ගෙන ඇතිය යන්න මෙම අති විශේෂ ගැසට්ටුවෙන් ජනාධිපතිවරයා අපට පෙන්නුම් කරන සත්‍යයය. මේ ආකාරයේ පමා කිරීම් අවසානයේ ඡන්ද පදනම සෝදාපාළුවට ලක්වීමේ සත්‍යයට ආණ්ඩුවට මුහුණ දීමට සිදුවනු ඇත. එය සදාකාලිකවම පමා කළ හැකි එකක් නොවේ. ජනක බණ්ඩාර තෙන්නකෝන් ඇමතිවරයාගේ ගැසට් නිවේදනය අනුව කල්දැමූ පළාත් පාලන ආයතනවල සභිකයින්ගේ ධුර කාලය අවසන් වීමට නියමිතව ඇත්තේ 2023 මාර්තු 19 වැනිදාය. ඒ සඳහා ඇති ඈතම දිනය එයය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි