No menu items!
26.2 C
Sri Lanka
28 March,2024

තුසිත් මුදලිගේ කිසිම වරදක් කර නැත – පැමිණිල්ලට පහරදී විත්තිකරුවන් බේරාගැනීමේ මාධ්‍ය බැලමෙහෙවර

Must read

■ අරුණ ජයවර්ධන

යහපාලන ආණ්ඩුව බලයට එන්නට එක හේතුවක් වන්නේ, ඊට පෙර පැවැති රාජපක්‍ෂ ආණ්ඩුවේ දැවැන්ත මහජන මුදල් මංකොල්ලයත්, දූෂණත්, වංචාත් වෙනත් අපරාධයනුත්ය. යහපාලන ආණ්ඩුව ඒ කාර්යය ඉටුකිරීම සඳහා විවිධ පියවර ගත් අතර, ආණ්ඩුවේ නායකයන් දෙපළ ඇතුළු අනෙකුත් පිරිස මේ කාර්යය සඳහා දේශපාලන අධිෂ්ඨානයකින් යුතුව නායකත්වය නොදීම නිසා, ආණ්ඩුවේ ආයුකාලය අවසන් වන විටත්, පටන්ගත් විමර්ශන බොහොමයක් තීරණාත්මක අවසානයක් කරා ගෙනයාමටත්, ඒවාට අදාළව නඩු පැවරීමටත්, වගකිවයුත්තන්ට නිසි දඬුවම් ලබාදීමටත් නොහැකි විය. තීරණාත්මක අවසානයක් කරා ගිය එකම නඩුව වන්නේ හිටපු ජනාධිපති ලේකම් ලලිත් වීරතුංග හා අනුෂ පැල්පිටට එරෙහිව පවත්වාගෙන ගිය ප්‍රකට සිල්රෙදි නඩුවයි. විත්තිකරුවන් දෙදෙනාම එහිදි වරදකරුවන් වූ අතර, ඔවුන් දෙදෙනා අභියාචනාධිකරණයට ඉදිරිපත් කළ අභියාචනය මේ දිනවල විභාග වෙමින් පවතියි.

ආණ්ඩුව පෙරළීමෙන් පසු
2019 නොවැම්බරයේදී ගෝඨාභය රාජපක්‍ෂ මහතා ජනාධිපති වීමත් සමග එතෙක් පවත්වාගෙන ආ විමර්ශන හා නඩු කටයුතුවල නාට්‍යාකාර වෙනසක් සිදුවිය. සමහර නඩුවල ප්‍රධාන සාක්‍ෂිකරුවෝ තමන් ආණ්ඩුව වැටෙන්නට පෙර දුන් සාක්‍ෂියට පරස්පර කාරණා පසුව අධිකරණයට කීහ. ප්‍රතිඵලය විත්තිකරුවන් නිදහස් කිරීමට සිදුවීමය. ‘අන්න බලන්න, අපිට විරුද්ධව බොරු නඩු පැටලුවා. ඒවායෙන් අපි නිදහස් වුණා’ යැයි උදාන වාක්‍ය කියමින් ජයපැන් බොන්නට, ඒ නඩුවල විත්තිකාරයන්ට එනිසා අවස්ථාව ලැබිණ.
ඒ අතර, 2015-19 කාලය තුළ දේශපාලන පළිගැනීම් වශයෙන් අපරාධ චෝදනා එල්ලවීම හෝ නඩු පැවරීම ලද පුද්ගලයන්ට ඇවිත් පැමිණිලි කළ හැකි ජනාධිපති කොමිෂන් සභාවක් ජනාධිපති ගෝඨාභය රාජපක්‍ෂ විසින් පත්කරන ලදි. ඉහත කී නඩුවල විත්තිකරුවෝ පෝලිමේ යමින් මෙම කොමිසම හමුවට පැමිණිලි ඉදිරිපත් කරන්නට වූහ. කොමිසමද ඒ පැමිණිලි සාදරයෙන් බාරගෙන, විත්තිකරුවන්ට විරුද්ධව නඩු පැවරූ, නඩුවල පැමිණිල්ල මෙහෙයවූ, අපරාධ විමර්ශන පැවැත්වූ- පවත්වාගෙන ගිය රජයේ නීතිපති දෙපාර්තමේන්තුවේ නීතිඥවරුන්, පොලිස් නිලධාරීන් වගඋත්තරකරුවන් කරමින් ඔවුන් තම කොමිසම හමුවට කැඳවන්නට විය. රටේ නීතිය අනුව පවරන ලද අපරාධ නඩුවල විත්තිකරුවෝ, මේ කොමිසම ඉදිරියේ අහිංසක පැමිණිලිකරුවන් බවට පත්වූහ. විමර්ශනය කළ පොලිස් නිලධාරීන්, නඩු මෙහෙයවූ රජයේ නීතිඥවරුන් පමණක් නොව, ඒ අපරාධ ගැන සොයා බලමින් වරදකරුවන් නීතිය ඉදිරියට පැමිණවීම සඳහා මැදිහත්වු දේශපාලකයන්ද කොමිසම ඉදිරියේ වගඋත්තරකරුවන් බවට පත්වූහ. ඒ කොමිසම ඉදිරියට සාක්‍ෂි දෙන්නට පැමිණි හැම විත්තිකාරයකුම කළ පොදු සඳහනක් වූයේ, ‘මගේ නඩුවට ගෝඨාභය මහත්තයා පටලවන්නට පොලිස් නිලධාරීන් උත්සාහ කළා. ගෝඨාභයගේ නම කිව්වොත් මාව නිදහස් කරනවා කිව්වා. රට යවනවා කිව්වා. අපට අපරාධ කරන්න කිව්වේ ගෝඨාභයයි කියන්න කිව්වා, කිව්වේ නැත්නම් මාව හිරේ යවනවා කිව්වා.’ යන්නය.
මේ වන විටත් රටේ සාමාන්‍ය අධිකරණ ඉදිරියේ විභාග වෙමින් පවතින මේ සෑම නඩුවකම පාහේ සාක්‍ෂිකරුවන් ජනාධිපති කොමිසම ඉදිරියට කැඳවා ඔවුන්ගෙන් නැවත සාක්‍ෂි ගැනීම සිදුවෙමින් පවතියි. උදාහරණයක් හැටියට, ප්‍රගීත් එක්නැලිගොඩ අතුරුදහන් කිරීම ගැන පවරා තිබෙන අපරාධ නඩුවේ පැමිණිල්ලේ ප්‍රධාන සාක්‍ෂිකරුට කොමිසමෙන් කැඳවීමක් ලැබුණු විට, තම මහාධිකරණය ඉදිරියේ සාක්‍ෂි දෙන තුරු වෙනත් කිසිම කොමිසමක සාක්‍ෂි නොදිය යුතුයැයි එම නඩුව විභාග කරමින් සිටින ත්‍රිපුද්ගල මහාධිකරණය නියම කෙළේය. එහෙත්, කොමිසම ඒ සාක්‍ෂිකරු කැඳවා, සාක්‍ෂි කූඩුවට නංවා, කොමිසමේ සභාපතිවරයාම ඔහුගෙන් සාක්‍ෂි ලබාගත්තේය.
තමන් වෙනුවෙන් අපරාධ කළවුන් ගලවා ගන්නට අලුත් ආණ්ඩුව අධිෂ්ඨානශීලිව හා මනා සැලසුමකින් යුතුව කටයුතු කළේ, කරමින් සිටින්නේ, කෙසේද යන්න ඉහත විස්තරයෙන් පැහැදිලි වෙයි.

රජයේ නීතිඥවරුන්ට පහරදීම
ආණ්ඩුවේ වැඩපිළිවෙළ එතෙකින් අවසන් නොවේ. එහි එක් අංශයක් වන්නේ, රාජපක්‍ෂ ආණ්ඩුවේ විත්තිකාර දේශපාලකයන්ට හා ඉහළ නිලධාරීන්ට විරුද්ධව ඇති අපරාධ තොරතුරු විශ්ලේෂණය කර නඩු පැවරූ, එම නඩුවල රජයේ නීතිපතිවරයා නියෝජනය කරමින් පැමිණිල්ල මෙහෙයවූ, කිසිම දේශපාලන පෙළඹවීමකින් තොරව තම රාජකාරිය වෙනුවෙන් පමණක් කැපවූ කීර්තිමත් රජයේ නීතිඥවරුන් තෝරාගෙන ඔවුන්ට ප්‍රහාර එල්ල කිරීමයි. මේ නිලධාරීන්ට මඩ ගැසීමේ හා අපකීර්තියට පත්කිරීමේ පහත් මාධ්‍ය මෙහෙයුමක්ද ඒ සමගාමීව ක්‍රියාත්මක වෙයි. මේ වෛරී ප්‍රහාරයට මේ මොහොතේ ලක්වී සිටින එක් අයකු වන්නේ, රජයේ නීතිපති දෙපාර්තමේන්තුවේ නියෝජ්‍ය සොලිසිටර් ජෙනරාල් තුසිත් මුදලිගේය. ඊට අමතරව, රජයේ ජ්‍යෙෂ්ඨ නීතිඥ ජනක බණ්ඩාරද, නිශ්ශංක සේනාධිපතිට එරෙහි ඇවන්ට්ගාඞ් නඩුවේ පැමිණිල්ල මෙහෙයවීම හේතුවෙන් ජනාධිපති කොමිසම ඉදිරියේ වගඋත්තරකාරයෙකු කර තිබිණ.
පසුගිය කාලය තුළ, තුසිත් මුදලිගේ මහතාගේ නම ජනාධිපති කොමිසම ඉදිරියේ කියැවෙන්නේ වරක් දෙවරක් නොවේ. ඒ කතා අසාගෙන සිටින සාමාන්‍ය මිනිසකුට වැටහෙනු ඇත්තේ, ‘තුසිත් මුදලිගේ යනු නීති විරෝධී ආකාරයෙන් රජයෙන් දීමනා ලබාගෙන, දේශපාලන වශයෙන් පුද්ගලයන්ගෙන් පළිගැනීමට බොරු නඩු පැටලූ අසත්පුරුෂයකු’ ලෙසය. මේ සැලසුම්සහගත ප්‍රහාරයට ඔහු ලක්කිරීමට හේතුව නම් පැහැදිලිය. රාජපක්‍ෂ ආණ්ඩුව කාලයේ අපරාධ සම්බන්ධයෙන් පවරා ඇති නඩු ගණනාවකම පැමිණිල්ල මෙහෙයවූ, මෙහෙයවමින් සිටින නීතිඥවරයා ඔහු වීමයි. ඒ වාගේම සුප්‍රකට භාරත ලක්‍ෂ්මන් ඝාතන නඩුවේද පැමිණිල්ලේ නීතිඥවරයා ඔහු වීමයි. ඒ ගැන වෙනම පැහැදිලි කළ යුතුය. ඉතින්, ඔහු ඔවුන්ට ද්‍රෝහියෙක් නොවේද?

කියවන විට ලියන්නෝ
පොහොට්ටු පක්‍ෂයේ ජාතික ලැයිස්තු මන්ත්‍රී ටිරාන් අලස්ට අයත් ‘මව්බිම’ පුවත්පත, එක දිගට, දින කිහිපයක් (ඔක්තෝබර් 4, 5, 6, 8 දිනවල) මුල් පිටුවේ ප්‍රවෘත්ති පළකරමින්, (ඒවා එකම ප්‍රවෘත්තිය කෑලිවලට කඩා දින කිහිපයක් පළ කළ ඒවාය.) තුසිත් මුදලිගේ මහතා අපකීර්තියට පත්කිරීමේ අසාර්ථක එහෙත් ලජ්ජා නැති වෑයමක නිරත විය. ඒ කිසිම ප්‍රවෘත්තියක එය ලියූ ලේඛකයකුගේ නම සඳහන් නොවන බැවින්, අප ඒවා භාරගත යුත්තේ පුවත්පතේ කර්තෘවරයාගේ ලියමන් ලෙසය.
ඒ ප්‍රවෘත්තිවල සමස්ත අන්තර්ගතය මෙසේය. ‘පසුගිය යහපාලන රජය දේශපාලන පළිගැනීම් කිරීමේ අරමුණෙන්, අරලියගහ මන්දිරයේ ස්ථාපිත කරන ලද, දූෂණ විරෝධී කමිටු ලේකම් කාර්යාලයේ සේවය කරමින් වැටුප් ලැබූ නීතිපති දෙපාර්තමේනතුවේ ඇතැම් ජ්‍යෙෂ්ඨ නිලධාරීන්, බරපතළ වෘත්තීය විෂමාචාරයක නිරතවී තිබෙන බවට සාක්‍ෂි සහිතව තහවුරු වී ඇත. දේශපාලනික අරමුණු මත පිහිටා කවරකුට නඩු පැවරිය යුතුදැයි යන්න පිළිබඳව තීරණය කළ දූෂණ විරෝධී කමිටුවේ නිර්දේශය පරිදි තෝරා ගත් අයවලුන්ට නඩු පැවරීමට අදාළ ලිපිගොනු සකසා ඇත්තේ ඉහත නිලධාරීන් විසිනි. නඩු පැවරීම්වලට අදාළ ලිපිගොනු නීතිපති දෙපාර්තමේන්තුවට යොමු කළ පසු නඩු කටයුත්ත සඳහා අධිකරණය ඉදිරියේ පෙනීසිට ඇත්තේද එම නිලධාරීන් බව මේ වන විට ‘හෙළිදරව් වී’ තිබේ. .. දෙපාර්තමේන්තුවේ ස්ථිර තනතුරුවල සේවය කරමින් දූෂණ විරෝධී ලේකම් කාර්යාලයෙන්ද වැටුප් ගනිමින් සේවය කළ මෙම නිලධාරීන් තමන්ගේ වෘත්තීය බැඳීම් ඝට්ටනයට ලක්කර ඇති අතර, රජයේ සේවයේ යෙදෙමින් දේශපාලන අරමුණු සඳහා තම සේවාව ලබාදෙමින් බරපතළ වෘත්තීය විෂමාචාරයන් සිදුකර ඇති බව ජ්‍යෙෂ්ඨ නීතිවේදීහු පෙන්වා දෙති.’

නොදන්නා දේවල්
මේ කතාව කීම සඳහා එකිනෙකට සම්බන්ධ ප්‍රවෘත්ති හතරක් දින හතර තුළ මව්බිමේ පළවිය. ඒවා පරීක්‍ෂාවෙන් කියවන රාජ්‍ය සේවය, ආයතන සංග්‍රහය, මුදල් රෙගුලාසි හා රාජ්‍ය පරිපාලනය ගැන දන්නා ඕනෑ ම කෙනකු, නැති වරදක් ආරෝපණය කිරීමට එම ප්‍රවෘත්තිවලින් දරන උත්සාහය ගැන සිනා පහළ කරනු නිසැකය. ඒ වාගේම, නීතිඥ වෘත්තියේ ළැදියාවන් අතර ගැටුම්, බරපතළ වෘත්තීය විෂමාචාරය ගැන සාමාන්‍ය අවබෝධයක් තිබෙන, නීති විදුහලේ අවසන් වසරේ සිසුවකු පවා ප්‍රවෘත්තියේ ඇති තොරතුරු විහිළුවට ලක්කරනු නියතය. එක පැත්තකින් මේ බරපතළ වචන යොදා තමන්ගේ සාමාන්‍ය පාඨකයන් නොමග යැවීමට පුවත්පත දරන උත්සාහය ගැන කනගාටුවන ඔවුන් ඉන් පසු, මේ බරපතළ වෘත්තීය විෂමාචාරය ගැන ‘පෙන්වා දුන් ජ්‍යෙෂ්ඨ නීතිවේදීන්’ කවුදැයි කියා සානුකම්පිතව විපරම් කරනු ඇත. ඒ තරම් නොදැනුවත්කමකින්, කාගේ හෝ ඇණවුමකින් මේ අසරණ ලියන්නා, ප්‍රවෘත්තිය ලියා ඇති බැවිනි.
කෙසේ වෙතත්, නියෝජ්‍ය සොලිසිටර් ජෙනරාල් තුසිත් මුදලිගේ දූෂණ විරෝධී කමිටුවට ලේකම් කාර්යාලයෙන් දීමනාවක් (වැටුපක් නොවේ) ලැබීම, විවිධ අයවලුන්ට නඩු පැවරීමට අදාළ ලිපිගොනු සැකසීම, නඩුවේ පැමිණිල්ල මෙහෙයවීම නීති විරෝධීද? වෘත්තීය විෂමාචාරයක් ඉන් සිදුවීද? ළැදියාවන් අතර ගැටුමක් සිදුවී තිබේද? යන්න ගැන බොරුවළවල්වල නොවැටී ඇත්ත සොයනු රිසියවුන්ගේ දැනගැනීම සඳහා පහත කරුණු අනාවරණය කළ යුතුය.

නීතිපතිට ලිපියක්
2015 පෙබරවාරි 5 වැනිදා, එවකට නීතිපති දෙපාර්තමේන්තුවේ ප්‍රධානි, නීතිපතිවරයා වෙත අගමැති ලේකම් ඊ.එම්.එස්.බී. ඒකනායක වෙතින් ලිපියක් ලැබේ. එහි සඳහන් වන්නේ, ‘අගමැතිවරයා ප්‍රධානත්වය උසුලන දූෂණ විරෝධී කමිටුවේ රැස්වීම් ඒ වන විටත් ඇරඹී ඇති බවත්, කමිටුවේ ඊළඟ රැස්වීම පෙබරවාරි 5වැනිදා, (එදිනම) සවස 6.30ට අරලියගහ මන්දිරයේදී පැවැත්වෙන බවත්, එම රැස්වීමට ඔබේ දෙපාර්තමේන්තුවෙන් සුදුසු නිලධාරියකු සහභාගි කරවන්නේ නම් කෘතඥ වන බවත්’ය.
අගමැති ලේකම්වරයාගේ ඉහත ලිපියට, මාර්තු මස 11 වැනිදා පිළිතුරු යවන නීතිපති දෙපාර්තමේන්තුවේ ජ්‍යේෂ්ඨ රජයේ නීතිඥ (පරිපාලන) එච්. අසාඞ් නවාවි, කියා සිටින්නේ, දූෂණ විරෝධී කමිටුව සඳහා තම දෙපාර්තමේන්තුවෙන් දෙදෙනකු නම් කරන බවයි. එනම්, ජ්‍යේෂ්ඨ අතිරේක සොලිසිටර් ජෙනරාල් ජනාධිපති නිතිඥ කපිල වෛiරත්න හා ජ්‍යෙෂ්ඨ රජයේ නීතිඥ තුසිත් මුදලිගේය.

පත්කිරීම නීත්‍යනුකූලයි
ඉන්පසු මාර්තු 16 වැනිදා තුසිත් මුදලිගේ අමතා ලිපියක් එවන අගමැති ලේකම් සමන් ඒකනායක මෙසේ කියයි.
‘2015 පෙබරවාරි 11 දින කැබිනට් තිරණය අනුව පිහිටුවන ලද දූෂණ විරෝධී කමිටු ලේකම් කාර්යාලයේ උපදේශක හැටියට ඔබ පත්කර ඇති බව සතුටින් දැනුම් දෙමි. මෙය මාස හයක කාලයකට බලපවත්වන අර්ධකාලීන, තාවකාලික පැවරුමකි. ඔබේ පැවරුම 2015 පෙබරවාරි 25 සිට බල පැවැත්වෙයි. මේ පැවරුම සඳහා ඔබේ මූලික වැටුපෙන් සියයට පනහක දීමනාවක් ගෙනු ලැබේ. ආයතනික සංග්‍රහය, මුදල් රෙගුලාසි, දෙපාර්තමේන්තු විධාන සහ රජය විසින් කලින් කලට නිකුත් කරන වෙනත් ඕනෑම රෙගුලාසියකට හෝ නියමයකට ඔබ යටත් වනු ඇත.’
මේ ලිපියේ පිටපත්, නීතිපතිවරයාටද, විගණකාධිපතිවරයාටද, ප්‍රධාන ගණකාධිකාරීවරයාටද, දූෂණ විරෝධී ලේකම් කාර්යාලයේ අධ්‍යක්‍ෂවරයාටද, ප්‍රධාන කළමනාකරණ සහායකටද, පෞද්ගලික ලිපිගොනුවටද යවන බව ලිපියේ පහතින් සඳහන් වේ. ඒ අනුව, අගමැති ලේකම්වරයා විසින් කරන ලද තුසිත් මුදලිගේ මහතාගේ මේ පත්වීම ගැනත්, එය අර්ධකාලීන පැවරුමක් බවත්, ඔහුගේ දෙපාර්තමේන්තු මූලික වැටුපෙන් සියයට පනහක් මේ පැවරුමට ගෙවන බවත් ඉහත සියලුම දැනගත යුතු රජයේ ඉහළ නිලධාරීහු දැනසිටියහ.
ඊට පසුව, 2015 ජුනි 30 වැනි දින අධිකරණ අමාත්‍යාංශයේ ලේකම්වරයා අමතා යවන ලිපියක් මගින්, නීතිපති දෙපාර්තමේන්තුවේ නියෝජ්‍ය සොලිසිටර් ජෙනරාල් (පරිපාලන) සෝභිත රාජකරුණා දන්වන්නේ, තුසිත් මුදලිගේ මහතා දූෂණ විරෝධී කමිටුවේ උපදේශක ධුරයේ කාර්ය පැවරුම කරන්නේ නීතිපති දෙපාර්තමේන්තුවේ සිය සාමාන්‍ය රාජකාරී කටයුතු කරන අතරතුරම බවත්ය.

සාමාන්‍ය රාජකාරි අතරතුර
මේ කරුණු සිහිබුද්ධියෙන් සලකා බලන කල, තුසිත් මුදලිගේ මහතා තම දෙපාර්තමේන්තු ප්‍රධානියාගේ නියමයක් මත අදාළ පැවරුම භාරගෙන ඇති බවත්, මුදල් රෙගුලාසි, ආයතන සංග්‍රහය, දෙපාර්තමේන්තු නියමයන් යන සියල්ලට යටත් බවත්, නීත්‍යනුකූලව තමන්ට හිමි දීමනාවක් පමණක් ලබාගෙන ඇති බවත් (එය මසකට රුපියල් 22360කි.) පැහැදිලි නොවේද? යම් හෙයකින්, මුදලිගේ මහතා තමාට නීත්‍යනුකූලව හිමි දීමනාව නොගෙන කමිටු කාර්යාලයේ වැඩ කළේ නම් ඔහු කිසියම් දේශපාලන හෝ අතිරේක වුවමනාවකින් හෝ කටයුතු කළායැයි සිතන්නටවත් තිබිණ.
රජයේ නිලධාරියකු තම රාජකාරියට අමතරව වෙනත් රාජකාරියකට යොදවන අවස්ථාවන්හිදී, මුල් වැටුපෙන් කිසියම් ප්‍රතිශතයක අතිරේක දිමනාවක් නීත්‍යනුකුලව ඔහුට හෝ ඇයට ලැබෙන බව නොදන්නා රජයේ නිලධාරීහු කවුද? නීතිපති
දෙපාර්තමේන්තුව ගැනම සැලකුවහොත්, මේ දිනවල
ක්‍රියාත්මක වන දේශපාලන පළිගැනීම් පිළිබඳ ජනාධිපති
කොමිසමටද ජ්‍යේෂ්ඨ රජයේ නීතිඥවරුන් තිදෙනකු
සේවය කරන බවත්, ඔවුන්ටද ඒ සඳහා ව්‍යවස්ථාපිත
දීමනාවක් ගෙවන බවත් අලුත් දෙයක් නොවේ. ඉතිහාසය
පුරාම වරින් වර පිහිටුවන ලද, රජයේ නීතිඥවරුන්ගේ
සහාය අවශ්‍ය වන හැම කොමිසකදීම, කමිටුවකදීම
පිළිවෙත වී ඇත්තේ එයයි. ඒ නිසා, එයින් සිදුව බලවත්
විෂමාචාරය කුමක්ද?
පොලිසිය විමර්ශනයක් කර අවසාන වූ විට නීතිපති
දෙපාර්තමේන්තුවට අදාළ ලිපි ගොනුව යැවීමෙන් පසු
රජයේ නීතිඥවරයකුට ගොනුව බාර වන අතර, එතැන්
සිට තවත් අවශ්‍ය විමර්ශන සඳහා මග පෙන්වන්නේත්,
අධිචෝදනා පත්‍ර සකස් කර අධිකරණයේ ගොනුකර,
පැමිණිල්ල මෙහෙයවන්නේත්, සමහර විට නඩුවේ
අභියාචනයක් ගියහොත් ඒ සඳහා නීතිපති දෙපාර්තමේන්තුව
වෙනුවෙන් පෙනීසිටින්නේත් එකම රජයේ අධිනීතිඥවරයා
බව නොදන්නේ කවුද? එහිදී සිදුවන ළබැඳියාවන් අතර
ගැටුමක් තිබේද?

නඩු ලැයිස්තුවක්
මව්බිම පුවත්පත් වාර්තාවල, තුසිත් මුදලිගේ මහතා
පෙනීසිට ඇති නඩුවල ලැයිස්තුවක්ද දැක්වෙයි. ඒ
ලැයිස්තුව කියවන කෙනකුට, මේ තරම් සංවිධානාත්මක
ප්‍රහාරයක් මුදලිගේ මහතාට එල්ල කරන්නේ ඇයිද යන්න
මොනවට පැහැදිලි වෙයි. නඩු ලැයිස්තුව මෙසේය: බැසිල්
රාජපක්‍ෂ මහතාට එරෙහි නඩු, දුමින්ද සිල්වාට එරෙහි
භාරත ලක්‍ෂ්මන් ඝාතන නඩුව, මහින්දානන්ද අලුත්ගමගේ,
විමල් වීරවංශ, රෝහිත අබේගුණවර්ධන, නාමල් රාජපක්‍ෂ,
යෝෂිත රාජපක්‍ෂ, ප්‍රසන්න රණතුංග, ලලිත් වීරතුංග, අනුෂ
පැල්පිට, ගාමිණී සෙනරත්, පියදාස කුඩාබාලගේ යන අයට
එරෙහි නඩු.
මේ පත්තරවල ලියන්නන්, දැන හෝ නොදැන විකෘති
කර ලියන මේ දේවල්වලින්, තමන්ගේ ලිවීම් කියවන
පාඨකයන්ගේ මනස කුණු කළ හැකියැයි ඔවුන් සිතනවා
ඇත. එවැනි පාඨක පිරිසක් සිටිත් නම්, එහි වාසිය
මේ ලියන්නන්ටමය. හුදෙක් තමන්ගේ හාම්පුතුන්ගේ
වුවමනාවට, පත්තරකාරයන් නොව කියවන විට ලියන
ලියන්නන් බවට මේ පුද්ගලයන් පත්වීම නිසා, කර්තෘ
සංසදයේ පුවත්පත් ආචාර ධර්ම කොටා පෙව්වත් ඔවුන්ගෙ
න් ආචාරධර්මීය මාධ්‍ය භාවිතාවක් බලාපොරොත්තු විය
නොහැකිය. එහෙත්, ඔවුන්ගේ අසාධාරණ සැලසුම්සහගත
ප්‍රහාරයට, මේ රටේ යුක්තිය, සාධාරණය වෙනුවෙන් හා
තම රාජකාරිය වෙනුවෙන් අවංකව කැපවී කටයුතු කරන
රජයේ නිලධාරීන් ලක් කරන්නට නම් ඉඩ දිය හැකි
නොවේ.

භාරත ඝාතන නඩුව
මේ ලියන්නන් නොදැනීම ඉහත ලැයිස්තුවට දමා
ඇත්තේ භාරත ලක්‍ෂ්මන් ඝාතන නඩුවයි. අනක් ඒවා
රාජපක්‍ෂ පාලනය කාලේ සිදුවූ වංචා දූෂණවලට අදාළ
නඩුයැයි එක ගොඩකට දැමිය හැකි වුණත්, භාරත ලක්‍ෂ්මන්
නඩුව එවැන්නක් නොවේ. රාජපක්‍ෂ පාලන කාලය තුළම
සිදුවීමක් පාදක කරගත් ඒ නඩුව, විනාඩියක් ඇතුළත
පුද්ගලයන් හතරදෙනකු වෙඩි තබා මැරූ බිහිසුණු
අපරාධයකට අදාළ නඩුවකි. එහි කිසිම දේශපාලන
වුවමනාවක් නැත. මියගිය අයද, ප්‍රහාරකයාද එකම
දේශපාලන පක්‍ෂයේය. මහේස්ත්‍රාත් අධිකරණය ඉදිරියේ
පැවැති සිව් මිනීමැරුමේ මූලික විභාගය අවසානයේදී,
මහාධිකරණයක් ඉදිරියේ විභාග කරන්නට තරම් නඩුවේ
සාක්‍ෂි ඇතැ’යි මහේස්ත්‍රාත්වරයා තීන්දු කළේය. නඩුව
ඇසීම සඳහා ත්‍රිපුද්ගල විනිසුරු මඬුල්ලක් පත්කරන
ලෙස නීතිපතිවරයා කළ ඉල්ලීමට අනුව අගවිනිසුරුවරයා
විනිසුරු මඬුල්ල පත්කළේය. ඒ ත්‍රිපුද්ගල විශේෂ
මහාධිකරණය විසින් වැරදිකරු කරන ලදුව මරණ දඬුවම
නියම වී සිටි දුමින්ද සිල්වා, ඉදිරිපත් කළ අභියාචනය
ශ්‍රේෂ්ඨාධිකරණයේ පංච පුද්ගල විනිසුරු මඬුල්ලක් විසින්
අහක දමන ලදි. මරණ දඬුවම ස්ථිර විය. ඒ ඝාතන නඩුවත්,
මුදලිගේ මහතාට පහර ගැසීම සඳහා එක ගොඩකට
දැමීමෙන්, මේ ක්‍රියාවලියේ තවත් යටි අරමුණක් එළිදරව්
වෙයි. එය නම්, ‘දුමින්ද සිල්වා පව්. ඔහු පෝරකයට නියම
වී සිටින්නේ දේශපාලන පළිගැනීමක් නිසා’ යන මතයක්
සමාජය තුළ සංවිධානාත්මකව පැළ කිරීමයි. එහි අවසාන
ප්‍රතිඵලය විය හැක්කේ දුමින්ද සිල්වාට ජනාධිපති සමාව
ප්‍රදානය කිරීමයි. ඒ ගමනේ දෙවැනි පියවර, විපක්‍ෂයේ
මනෝ ගනේෂන් ඇතුළු පිරිසගේද සහභාගිත්වයෙන් යුතුව
දුමින්ද සිල්වා නිදහස් කරන ලෙස ජනාධිපතිගෙන් ඉල්ලා
ලිපියක් අත්සන් කිරීමෙන්, දැනටමත් ආරම්භ වී තිබේ.

නිකමට මෙන් හිතමු
අවසානයට අපි මෙහෙමත් හිතමු. මේ ආණ්ඩුව
කවදා හරි පරාජය වී, වෙනත් ආණ්ඩුවක් බලයට පැමිණ,
‘ගෝඨාභය රාජපක්‍ෂ මහතා පත්කළ මේ ජනාධිපති
කොමිසම, රටේ අධිකරණ පද්ධතියට අයුතු ලෙස
මැදිහත්වූවක් බවටත්, කොමිසම ඉදිරියේ වගඋත්තරකාරයන්
හැටියට ගෙන්වන ලද්දේ දේශපාලන වශයෙන් පළිගන්නට
රාජපක්‍ෂ ආණ්ඩුවට වුවමනා අයවලුන් බවටත්’ චෝදනා
කොට, මේ කොමිසම ගැන හොයන්නට තවත් ජනාධිපති
කොමිසමක් අනාගතයේදී පත්කළහොත් තත්වය කෙබඳු
වේවිද? ඒ කොමිසම ඉදිරියට, දැන් කොමිසමේ සිටින
උපාලි අබේරත්න, චන්ද්‍රා ජයතිලක හා චන්ද්‍රා ප්‍රනාන්දු යන
අය වගඋත්තරකරුවන් හැටියට කැඳවුවහොත්, තත්වය
කෙතරම් අවලස්සන වනු ඇද්ද? ■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි