බානි හෙන්රිකස්
ඒ 1938 පෙබරවාරී 07 වන දින සැඳෑ භාගයයි. හිරු නොබසින අධිරාජ්‍යය ලෙස ප‍්‍රකට බි‍්‍රතාන්‍ය කිරීටයට අයත් යටත් විජිතයන් අතර පැවැත්වුණු අධිරාජ්‍ය ක‍්‍රීඩා උළෙල (ෑපචසරු ඨ්පැි* ඕස්ටේ‍්‍රලියාවේ සිඞ්නි නුවර අධිරාජ්‍ය ක‍්‍රීඩා ගම්මානයේ ක්රියාත්මක වෙමින් පැවතිණි. 1930 වර්ෂයේ ආරම්භ කරන ලද මෙම ක‍්‍රීඩා උළෙල 1938 වන විට පැවැත්වූයේ සිය තෙවන ක‍්‍රීඩා උළෙලයි. 1950 සිට මෙම ක‍්‍රීඩා උළෙල පොදු රාජ්‍ය මණ්ඩලීය ක‍්‍රීඩා උළෙල (ක්‍දපපදබඇ්කඑය ඨ්පැි* ලෙස හඳුන්වනු ලැබූ අතර, එය අදත් සැලකෙන්නේ ඔලිම්පික් ක‍්‍රීඩා උළෙලට පමණක් දෙවන වන ක‍්‍රීඩා උළෙල ලෙසයි.
ගිම්හානයේ සැඳෑවක දහස් ගණන් වූ පේ‍්‍රක්ෂක සමූහයා ඉදිරියේ ගෘහස්ථ ක‍්‍රීඩාගාරයක් තුළ ක්රියාත්මක වෙමින් පැවතියේ බොක්සිං ක‍්‍රීඩාවේ ෆෙදවේට් ඉසව්වේ අවසන් තරගයයි. ඒ, ස්කොට්ලන්තය නියෝජනය කළ එවකට ෆෙදවෙට් ඉසව්වේ ආධිපත්‍යය පතුරවාගෙන සිටි මේස් වොට්සන් සහ බි‍්‍රතාන්‍ය කිරීටය යටතේ පුංචි කොදෙව්වක්ව පැවති ශ‍්‍රී ලංකාව නියෝජනය කළ, යන්තම් 23 විය සපිරූ කුඩා සිරුරකින් යුත් කොලූගැටයෙකු අතර තරගයයි. පිළිගැනීම අතින් මෙය ගලිවර් සහ ලිලිපුට්ටන් අතර තරගයක් ලෙස පෙනුණද, තරගය ආරම්භ වී සුළු වේලාවක් ගතවන විට බොක්සිං වළල්ල පුරා හතර අතේ දුව පනිමින් හුරුබුහුටි කොදෙව් ක‍්‍රීඩකයා ප‍්‍රතිවාදියාට එල්ල කළ ශක්තිමක් වමත් පහර හමුවේ ප‍්‍රබලයා පසුබසින බවක් දිස්විය.
පළමු තරග වටය ආරම්භ වී විනාඩියක් ගතවීමට ප‍්‍රථම යව්වනයාගේ වමත් පහරට ගොදුරුවූ මේස් වොට්සන් බිම ඇද වැටුණු අතර, ක‍්‍රීඩාගාරය අත්පොලොසන් හඬින් ගිගුම් දෙද්දී කැනඩා ජාතික විනිසුරුවරයා ගණන් කිරීම ආරම්භ කලේය. 1,2,3, වශයෙන් 8 වන අංකය ගණින විට මේස් වොට්සන් අපහසුවෙන් නැගිට නැවතත් තරගයට එක්විය. එහෙත්, ඔහු ඒ වන විටත් දැඩි ලෙස ප‍්‍රහාරයට ලක්ව සිටි බවක් දිස්විය. මේ අවස්ථාවේදී ඔහුගේ ගැලවීමට පැමිණියේ පළමු තරග වටයේ ක‍්‍රීඩාව අවසන් බව දක්වන සීනු හඬයි. කෙටි විවේකයෙන් නැවතත් උත්තේජනයක් ලද මේස් වොට්සන් දෙවන තරග වටයට පිවිසියේ සිය අභිමානය රැුකගැනීමේ දැඩි අදිටනිනි. තරග වට දෙකක් අවසානයේ ක‍්‍රීඩකයන් දෙදෙනා කරට කර තරගයකට එළඹ සිටියද, තීරණාත්මක තුන්වන වටයේ දෙවන මිනිත්තුවේදී යටත් විජිතයේ උපන් කොලූගැටයාගේ ශක්තිමත් වමත් පහරින් ප‍්‍රබලයා බිම වැටුණේ, එදා සිලෝන් ලෙස හැඳින්වූ ශ‍්‍රී ලංකාවට ප‍්‍රථම අන්තර් ජාතික රන් පදක්කම හිමිකර දෙමිනි. මෙම හුරුබුහුටි කොලූගැටයා වූයේ එවකට සිලෝන් පොලිස් ක‍්‍රීඩා සමාජය නියෝජනය කළ ඒ.ඩබ්ලිව්. හෙන්රිකස් නොහොත් බානි හෙන්රිකස්ය.
බානි හෙන්රිකස් 1915 ජුනි මස 22 වැනි දින කොළඹදී උපත ලැබුයේ මධ්‍යම පන්තික බර්ගර් ජාතික පවුලක වැඩිමහල් දරුවා ලෙසය. කොළඹ රාජකීය විද්‍යාලයේ අධ්‍යාපනය ලබන කාලයේ පටන් බොක්සිං ක‍්‍රීඩාවට ලොල් වූ බානි ක‍්‍රීඩා දිවිය තුළ බොක්සිං ක‍්‍රීඩාවෙන් ලබා ගත හැකි සියලූම ගෞරවයන් ලබා ගැනීමට සමත්විය. එකල ජාතික මට්ටමේ ක‍්‍රීඩකයන් බොහෝ දෙනෙකුගේ වෘත්තීය නවාතැන වූ පොලිස් දෙපාර්තමේන්තුව බානිගේද වෘත්තීය නවාතැන විය. එවකට ඩිපෝ පොලීසිය ලෙස හැඳින්වූ වර්තමානයේ බම්බලපිටිය පොලිස් ක්ෂේත‍්‍ර බලකා මූලස්ථානයේ බොක්සිං වළල්ලෙන් වෘත්තියක් වශයෙන් බොක්සිං ක‍්‍රීඩාව ආරම්භ කළ බානි, ඉතා කෙටි කලකින් ශ‍්‍රී ලංකාවේ බොක්සිං ක‍්‍රීඩා ක්ෂේත‍්‍රයේ අමරණීය නාමයක් සටහන් කිරීමට සමත්විය. බානිගේ ජව අධික වමත් පහර හමුවේ බොක්සිං වළල්ලේ බිම නොසිපගත් ප‍්‍රධාන පෙළේ ක‍්‍රීඩකයන් කිසිවෙකු එකල සොයා ගැනීමට අපහසු විය.
ජාත්‍යන්තර තලයට පියමං කළ බානි 1938 සිඞ්නි නුවර පැවති අධිරාජ්‍ය ක‍්‍රීඩා උළෙලේ ශ‍්‍රී ලංකාව නියෝජනය කරමින් ෆෙදවේට් ඉසව්වෙන් තරගවැදී ශ‍්‍රී ලංකාවට ප‍්‍රථම අන්තර් ජාතික රන් පදක්කම හිමිකර දීමට දායක වූයේ බි‍්‍රතාන්‍ය අධිරාජ්‍යය තුළ පුංචි කොදෙව්වක්ව පැවති ශ‍්‍රී ලංකාවේ නම ජාත්‍යන්තර ක‍්‍රීඩා ක්ෂේත‍්‍රයේ රනින් බෞතීස්ම කරමිනි.
ශ‍්‍රී ලංකාවට ප‍්‍රථම ඔලිම්පික් රිදී පදක්කම හිමිකර දීමේ ගෞරවය ඩන්කන් වයිට් වෙත හිමිවේ. ඒ 1948 ලන්ඩන් ඔලිම්පික් උළෙලේ මීටර් 400 කඩුලූ පැනීමේ ඉසව්වෙන් රිදී පදක්කම හිමිකර ගැනීමෙනි. එහෙත් 1938 එදා අධිරාජ්‍ය ක‍්‍රීඩා උළෙලේදී බානි හෙන්රිකස් සිය බොක්සිං ඉසව්වෙන් දක්වන ලද සුවිශේෂ ක‍්‍රීඩා විලාසය නිරීක්ෂණය කළ බොහෝ ක‍්‍රීඩා විචාරකයන්ගේ මතය වී ඇත්තේ දෙවන ලෝක මහා සංග‍්‍රාමය හේතුවෙන් ලොවට අහිමි වූ 1940, 1944 ඔලිම්පික් ක‍්‍රීඩා උළෙල පැවැත්වූයේ නම් ප‍්‍රථම ඔලිම්පික් පදක්කම ශ‍්‍රී ලංකාවට හිමිකරදීමේ ගෞරවය බානි හෙන්රිකස් වෙත හිමිවීමට තිබුණු බවයි. එය බොහෝ විට රන් පදක්කම වනවා නිසැකය.
ජාත්‍යන්තර ක‍්‍රීඩා උළෙලවලදී මව්බිම වෙනුවෙන් පදක්කමක් ජයග‍්‍රහණය කිරීම ඉතා සුවිශේෂ තත්ත්වයකි. තම ක‍්‍රීඩා දිවිය තුළ ලබා ගත හැකි ඉහළම ගෞරවය වනුයේ තම මව්බිම වෙනුවෙන් ජාත්‍යන්තර ක‍්‍රීඩා උළෙලකදී ජයග‍්‍රහණය කරන ප‍්‍රථම රන් පදක්කම වන්නේ නම්, එය ලබා ගන්නා ක‍්‍රීඩකයා වෙත හිමි වන ගෞරවය කිසිදා දෙවැනි නොවේ. මන්ද එය නොබිඳෙන වාර්තාවක් වන බැවිනි. එහෙත් ශ‍්‍රී ලංකාව වෙත ප‍්‍රථම අන්තර්ජාතික රන් පදක්කම හිමිකර දුන් බානි ගැන ශ‍්‍රී ලාංකික ක‍්‍රීඩා ඉතිහාසය තුළ සඳහන්ව ඇත්තේ ඉතා අල්ප වශයෙනි.
කුමන හේතුවක් නිසා හෝ බානිගේ නම ක‍්‍රීඩා ඉතිහාසයේ රන් පිටු අතර සටහන්ව නොමැති බව ඉතා පැහැදිලිය. 1988 වර්ෂයේ ඇමරිකා එක්සත් ජනපදයේ කැලිෆෝනියා ප‍්‍රාන්තයේ පුරවැසිභාවය ලබා ශ‍්‍රී ලංකාවෙන් නික්මගිය බානි, 2007 වර්ෂයේ මැයි මස 07 වැනි දින කැලිෆෝනියා එස් කොන්ඩිෆෝ නගරයේදී සදහටම දෙනෙත් පියාගත්තේ ශ‍්‍රී ලංකා ක‍්‍රීඩා ක්ෂේත‍්‍රයේ ස්වර්ණමය මතකයන් අතීතයට එක්කරමිනි.
අසහාය ක‍්‍රීඩකයකු, සැබෑ මිනිසකු මෙන්ම වසර 33ක් තම මව්බිමට සේවය කළ ගෞරවනීය පොලිස් නිලධාරියෙකු වීමේ භාග්‍යය උදාකර ගත් බානි ගැන අද මෙන්ම හෙටත් කතා කළ යුතුව ඇත. එය ප‍්‍රථම ජාත්‍යන්තර පදක්කම තම මව්බිමට හිමිකර දුන් ක‍්‍රීඩකයෙකුට කරන ගෞරවයක් මෙන්ම මව්බිමේ ජයග‍්‍රහණය වෙනුවෙන් අනාගතයේදී කැපවීමට සිටින හෙට දිනයේ ක‍්‍රීඩා පිටිය ජයගන්නා දූ පුතුන් වෙත ලැබෙන ජවයක්ද වනවා නිසැකය.x
